सफ्टवेयरबाटै कर्मचारीलाई समायोजनको पत्र

 माघ ३, २०७५ बिहिबार १२:५२:० | उज्यालो सहकर्मी
unn.prixa.net

काठमाण्डाै - संघ, प्रदेश र स्थानीय तहमा समायोजन हुन झण्डै ७५ हजार कर्मचारीले अनलाइनमार्फत फाराम भरेका छन् ।

बुधबार राति १२ बजेसम्मको समयसीमामा झण्डै ७५ हजार कर्मचारीले समायोजनमा जान अनलाइन फारम दर्ता गरेका हुन् । योसँगै कर्मचारी समायोजनको थप प्रक्रिया अघि बढ्दैछ ।

प्रदेशमा कर्मचारी नहुँदा संघीयताप्रति नै नागरिकको आक्रोश बढ्दै गैरहेको बेला केन्द्र सरकारले प्रदेश, स्थानीय तह सबैमा तोकिएअनुसार कर्मचारी पठाउने तयारी गरेको छ । समायोजनको फारम भर्ने काम सकिएलगत्तै अबको केही समयमा नै सबै स्थानीय तह र प्रदेशमा कर्मचारी पुगिसक्ने सरकारले बताएको छ । 

समायोजन भएर प्रदेश र स्थानीय तहमा गएका कर्मचारी फेरि संघमा फर्कन नपाउने र वृत्ति विकासमै असर पर्ने गरि समायोजन गर्न लागिएको भन्दै कर्मचारीहरु आन्दोलित बनेका थिए । तर कर्मचारीको बिरोधका बाबजुद पनि समायोजन प्रकृया अघि बढेपछि कर्मचारीहरुले बाध्य भएर फारम भरेका हुन् । 

फारम नभरेकालाई सफ्टवेयरबाटै समायोजन

फारम नभरे समायोजनमा जानु पर्दैन भन्ने सोच केही कर्मचारीमा हुन सक्छ । तर त्यस्तो छुट कसैले पनि नपाउने मन्त्रालयका प्रवक्ता सुरेश अधिकारीले स्पष्ट पार्नुभयो । फारम नभरेकाहरुलाई फारम भरेकाहरुले छानेर बाँकी रहेको तहमा समायोजन गरेर पठाइने उहाँले बताउनुभयो ।  

फारम भर्न छुटेका तथा निजामती किताबखानामा विवरण अपडेट नगराएका कर्मचारीको नाम समेत समायोजन सफ्टवेयरमा राखिने उहाँले बताउनुभयो । 

‘फारम भर्नेको नाम र विवरण त हुने नै भयो, तर फारम नभरेकाहरुको पनि नाम र विवरण सफ्टवेयरमा सिफ्ट गरिने छ, कसैको पनि नाम छुट्दैन,’ उहाँले भन्नुभयो ।

तर बिदा तथा अध्ययनमा रहेका कर्मचारीको हकमा भने समायोजन लागू नहुने उहाँले बताउनुभयो । समायोजनका लागि सरकारले राजपत्राङ्कित श्रेणी र राजपत्र अनंकित श्रेणी गरि छुट्टाछुट्टै व्यवस्था मिलाएको छ ।   

मन्त्रालयले गएको पुस ११ गते समायोजनका लागि चारवटा छुट्टाछुट्टै सूचना प्रकाशित गरेको थियो । सरकारी सेवाका कर्मचारी, साविक जिविसमा स्थायी नियुक्ति पाएर जिल्ला समन्वय समिति वा अन्य कुनै स्थानीय तहमा कार्यरत कर्मचारी, प्रदेश वा स्थानीय तहमा सेवा हस्तान्तरण भएका समिति, आयोग, प्रतिष्ठान वा यस्तै प्रकृतिका संगठित संस्थाका स्थायी कर्मचारी र संघ, प्रदेश र स्थानीय तहको नयाँ संगठन संरचनामा दरबन्दी कायम नभएका पदका कर्मचारीका लागि सरकारले आवेदन खुलाएको थियो । 

सफ्टवेयरबाटै नियुक्ति पत्र 

सरकारले संघमा ४७ हजार ९ सय २०, प्रदेशमा २२ हजार ७ सय ५५ र स्थानीय तहमा ६७ हजार ५ सय ३ जना कर्मचारीको दरबन्दी कायम गरेको छ । दरबन्दी अनुसार नै सफ्टवेयरले समायोजनमा पठाउने मन्त्रालयका प्रवक्ता अधिकारीले जानकारी दिनुभयो ।

समायोजन प्रकृया निष्पक्ष बनाउन सफ्टवेयर प्रणाली अवलम्बन गरिएको भन्दै प्रवक्ता अधिकारीले अब सबै काम सफ्टवेयरले नै गर्ने बताउनुभयो ।  

फाराम भरिसकेका सबै कर्मचारीको विवरण ‘भेरिफाई’ गरेपछि कर्मचारी समायोजन सफ्टेयरले नै को कहाँ पर्‍यो (संघ, प्रदेश र स्थानीय तह) भन्ने कुरो जानकारी दिनेछ ।

फारम भर्दा फारम भर्ने कर्मचारीले छानेको स्थानलाई सफ्टवेयरले पहिलो प्राथमिकता दिने छ । फारम नभरेकाको हकमा भने छानेर बाँकी छाडेका ठाउँमा सफ्टवेयरबाटै स्थान निर्धारण गर्ने संघीय मामिला तथा सामान्य प्रशासन मन्त्रालयका उपसचिव अनिता निरौलाले बताउनुभयो । 

कर्मचारीको विवरण ‘भेरिफाई’ गर्न केही समय लाग्ने र त्यसपछि समायोजन पत्र दिने काम सुरु हुने छ । पहिलो चरणमा सचिवहरुलाई समायोजन पत्र दिइने प्रवक्ता अधिकारीले बताउनुभयो । समायोजनको पत्र दिनुअघि मन्त्रिपरिषद्बाट निर्णय गराएर प्रदान गरिने छ । 

त्यसपछि क्रमैसँग सहसचिव र त्यसपछिका सबै कर्मचारीलाई पत्र थमाउने काम हुने उहाँले बताउनुभयो । अर्को हप्तादेखि समायोजनको पत्र थमाउने काम सुरु हुने पनि उहाँले बताउनुभयो ।  

कर्मचारी नहुँदा काम हुन सकेन भन्ने मुख्यमन्त्री लगायत स्थानीय तहका प्रमुखहरुको गुनासो पनि कर्मचारी समायोजनपछि समाधान हुने विश्वास सरकारले लिएको छ ।    

७५ हजार कर्मचारीले भरे समायाेजन फारम

अन्तिम अपडेट: चैत ११, २०८०

तपाईको प्रतिक्रिया