काठमाडाैं - प्रधानमन्त्री केपी शर्मा ओलीले उपप्रधानमन्त्री एवम् रक्षामन्त्री ईश्वर पोखरेललाई कार्यवाहक प्रधानमन्त्रीको जिम्मेवारी दिनुभएको छ ।

६ दिने चीन भ्रमणका लागि मंगलबार चीन प्रस्थान गरेका प्रधानमन्त्री ओलीले उपप्रधानमन्त्री तथा रक्षामन्त्री पोखरेललाई कार्यवाहक प्रधानमन्त्रीको जिम्मेवारी दिनुभएको हो । 

पार्टीको जिम्मेवारी माधव नेपाललाई 

प्रधानमन्त्री तथा नेकपाका अध्यक्ष केपी शर्मा ओलीले नेकपाको कार्यवाहक अध्यक्षको जिम्मेवारी वरिष्ठ नेता माधवकुमार नेपाललाई दिनुभएको छ ।

नेकपाका अर्का अध्यक्ष पुष्पकमल दाहाल प्रचण्ड देशमा नभएकाले तेश्रो बरियताका नेता नेपालले कार्यवहाक अध्यक्षको जिम्मेवारी पाउनुभएको नेकपाले जनाएको छ ।

प्रचण्ड श्रीमतीको उपचारका क्रममा सिंगापुरमा हुनुहुन्छ । 

संसदीय दलको नेताको जिम्मेवारी नेम्बाङ्गलाई 

प्रधानमन्त्री तथा नेकपाको संसदीय दलका नेता ओलीले संसदीय दलको नेताको जिम्मेवारी उप नेता सुवासचन्द्र नेम्बाङ्गलाई दिनुभएको छ ।

आफ्नो अनुपस्थितिमा संसदीय दलको जिम्मेवारी सम्हाल्नेगरि नेम्बाङ्गलाई जिम्मेवारी दिनुभएको प्रधानमन्त्री ओलीको सचिवालयले जनाएको छ ।