न्यूनतम साझा कार्यक्रम र सङ्कल्प प्रस्ताव ल्याउनु ठूलो कुरा होइन,...
चैत १५, २०८० बिहिबार
गुल्मी – गुल्मीको मुसिकोट नगरपालीका ४ अन्तर्गत दजाकोटमा फैलिएको झाडापखालाको मुख्य कारण पानीमा रहेकाे ई. कोलाई जीवाणु भएकाे पुष्टि भएकाे छ ।
नेपाल सरकार राष्ट्रिय जनस्वास्थ्य प्रयोगशाला टेकुले पानी र बिरामीको दिसाको नमुना परिक्षण गरेपछि पानीकै समस्याका कारण झाडापखालाको संक्रमण बढेको गुल्मी अस्पताल तम्घासका डाक्टर उत्तम पच्याले जानकारी दिनु भएको छ ।
डाक्टर पच्याका अनुसार एकजना बिरामीको दिसा परीक्षणमा सिगेला नामक जिवाणु समेत रहेको बताइएको छ । उहाँले पानीको नमूना र विरामीको दिसाको नमुना परीक्षण गर्दा कोलेरा जिवाणु भने नदेखिएको बताउनु भयो । त्यस ठाउँमा स्थानीयहरुले उपभोग गर्दै आएको पानीको मुहानमा फोहरका कारण पानी दूषित भएको र झाडापखालाको प्रकोप बढेको डाक्टर पच्याले बताउनु भयो ।
दूषित पानी सेवनका कारण दुई साताअघि त्यस गाउँमा झाडापखालाको प्रकोप बढ्दै गएपछि विश्व स्वास्थ्य संगठन र जिल्ला स्वास्थ्य कार्यालयको टोलीले प्रकोप क्षेत्रमा पुगेर बिरामीहरुको दिसा र पानीको नमूना संकलन गरी परीक्षणका लागि राष्ट्रिय जनस्वास्थ्य प्रयोगशाला टेकुमा पठाएको थियो ।
उक्त टोलीले प्रभावित क्षेत्रमा पुगेर पाँच जना व्यक्तिको दिसा र तीनवटा पानीको नमुना संकलन गरी पठाएको थियो । पानी र दिसाको नमुना परिक्षण गरेपछि प्रयोगशालाले पानीमा ई. कोलाई जिवाणु रहेको पुष्टि गरेको हो ।
डेढ सातासम्म फैलिएको झाडापखालाबाट दाजकोटमा १ सय ९५ जना मानिस बिरामी परेको र एकजना बालकको ज्यान समेत गएको मुसिकोट नगरपालिकाका स्वास्थ्य संयोजक डीबी जिसीले जानकारी दिनुभयाे ।
गुल्मीका क्रियाशील पत्रकार जनार्दन घिमिरे लामो समयदेखि उज्यालोमा कार्यरत हुनुहुन्छ ।