काठमाण्डौ – राष्ट्रिय पुनर्निर्माण प्राधिकरणले छुट तथा पुनःजाँच सर्वेक्षणको समयसीमा फेरि थपेको छ । 

भूकम्प प्रभावित जिल्लामा छुट तथा पुनःजाँच सर्वेको काम नसकिएकाले असार १५ गतेसम्मका लागि थप गरेको प्राधिकरणले जनाएको छ । २०७५ चैत १५ गतेबाट सुरु भएको सर्वेक्षणको काम वैशाख मसान्तभित्र सक्ने भनिएको थियो तर प्राविधिकको आन्दोलनका कारण काम प्रभावित भएको भन्दै जेठ मसान्तसम्म तोकिएको थियो । 

भूकम्प प्रभावितको गुनासो दर्ताको समय सकिएको तर छुट तथा सर्वेक्षणको समय १५ दिन थपिएको राष्ट्रिय पुनर्निर्माण प्राधिकरणका सहप्रवक्ता मनोहर घिमिरे बताउनुभयो ।

तोकिएको समयसीमाभित्र स्थानीय तहमा दर्ता भएका र स्थानीय तहबाट सिफारिस गुनासो केन्द्रीय सूचना प्रणालीमा आउनेक्रम जारी रहेको पनि उहाँले बताउनुभयो । अहिलेसम्म केन्द्रीय सूचना प्रणालीमा झण्डै ५८ हजार गुनासा प्राप्त भएका छन् ।