महोत्तरी – नेपाली सेनाका महारथी पूर्णचन्द्र थापाले देशलाई आवश्यक परेको खण्डमा नेपाली सेना हरेक भूमिका निर्वाह गर्न तयार रहेको बताउनु भएको छ । 

सोमबार महोत्तरीको सोनमा गाउँपालिका ३ को खखनामा आयोजित निःशुल्क बृहत् स्वास्थ्य शिनविरको अनुगमनको क्रममा पत्रकारसँग कुराकानी गर्नुहुँदै महारथी सेनाले हरेक परिस्थितिसँग सामना गर्नका लागि नेपाली सेना देशका हरेक भूभागमा खटिनका लागि तयार रहेको धारणा राख्नुभएको हो । 

विगतको समयमा नेपाली सेनाले देशको रक्षाका लागि अहम् भूमिका निर्वाह गरेको चर्चा गर्नुहुँदै महारथी थापाले हरेक पक्षले सकारात्मक सहयोग गरे नेपाली सेनाले पालिकामा गएर रंगशाला पनि निर्माण गर्ने बताउनु भयो । त्यही अवसरमा स्वास्थ्य राज्यमन्त्री डा. सुरेन्द्रकुमार यादवले महारथी थापालाई मायाको चिनो प्रदान गर्नुभयो । 

सोनमा गाँउपालिकामा गएको मंसिर २७ गतेदेखि पुस ५ गतेसम्म नेपाली आर्मीको प्राविधिक सहयोग एवं स्वास्थ्य तथा जनसंख्या मन्त्रालयको आर्थिक सहयोगमा बृहत स्वास्थ्य शिविरको आयोजना गरिएको छ । जसमा २० हजार सर्वसाधारणको उपचार गरिने आयोजक मूल समितिका संयोजक डा. यादवले जानकारी दिनुभयो ।