भारत : महिनावारी नभएको पुष्टि गर्न भित्री कपडा खोल्न लगाइयो, प्रधानाध्यापकसहित ४ निलम्बित

 फागुन ७, २०७६ बुधबार १३:२४:१७ | एजेन्सी
unn.prixa.net

काठमाण्डाै – भारतकाे एउटा विद्यालयका प्रधानाध्यापक, छात्रावास रेक्टर, र चतुर्थ श्रेणीका कर्मचारीलाई निलम्बित गरिएकाे छ । 

पश्चिमी राज्य गुजरातमा रहेको सहजानन्द गर्ल्स इन्स्टिट्युट (एसएसजीआई) मा अध्ययन गरिरहेका छात्राहरुले महिला कर्मचारीकाे अगाडि भित्री कपडा फुकाल्नु परेको बताएका बीबीसीले जनाएको छ । ६८ जना छात्रालाई कक्षाकोठाबाट शौचालयमा लगेर एक/एक गरी भित्री कपडा फुकाल्न लगाइएको खबरमा बताइएकाे छ ।

पीडित छात्राहरूका अनुसार महिनावारीसम्बन्धी नियमलाई कतिपय छात्राले उल्लङ्घन गरेको भन्दै कलेजले यस्तो गरेको हो । कलेजको नियमअनुसार महिनावारी भएका महिलाहरूलाई मन्दिर तथा भान्सामा प्रवेश गर्न र अरु विद्यार्थीलाई छुन प्रतिबन्ध छ ।

खाना खाने बेला महिनावारी भएका महिलाहरूले अरूभन्दा पर बस्नुपर्छ । आफ्नो थाल आफैले माझ्नुपर्छ र कक्षाकोठाभित्र सबैभन्दा पछाडिको बेन्चमा बस्नुपर्ने हुन्छ ।

हरेक छात्राले महिनावारी भएको बारेमा एउटा फायलमा नाम लेख्नुपर्नेमा गएकाे दुई महिनादेखि कसैले पनि नाम नलेखेपछि कलेज प्रशासनले महिनावारी भए वा नभएको पुष्टि गर्न लगाएको बीबीसीले जनाएको छ ।  

याे घटना गएकाे ११ फेब्रुअरीमा एसएसजीआई परिसरकाे छात्रावासमा भएकाे थियाे । 

अन्तिम अपडेट: फागुन २९, २०७६

तपाईको प्रतिक्रिया