सप्तरी – सप्तरीको बोदेवरसाइन नगरपालिकाका मेयर आतेशकुमार सिंह यादवले नगरपालिकाको कार्यालय भवन निर्माण गर्न करिब ५ करोड रुपैयाँ बराबरको जग्गा दान गर्नुभएको छ ।

नगरपालिकाको केन्द्र वरसाइन बजारमा कार्यालयको नयाँ भवन निर्माण गर्न उहाँले आफ्नै नाममा रहेको १० कठ्ठा जग्गा दान गर्नुभएको हो । पहिलेदेखि सञ्चालनमा रहेको नगरपालिकाको कार्यालय कृषि सेडमा सञ्चालन हुँदै आएको छ । सेवाग्राहीलाई सुविधा हुने गरी कार्यालय नरहेकाले बजारमै नयाँ कार्यालय भवन निर्माण होस भनेर उहाँले आफ्नै जग्गा दान गर्नुभएको हो ।

कार्यालय भवनका लागि दान गरिएको जग्गा मालपोत कार्यालय राजविराजबाट नगरपालिकाको नाममा रजिष्ट्रेशन गरिएको मेयर यादवले बताउनुभयो । मेयरले जग्गा उपलब्ध गराएसँगै नयाँ भवन निर्माण गर्न प्रक्रिया थालिएको नगरपालिका कार्यालयले जनाएको छ ।

साविक गाविसहरु वोदे वरसाईन, सारस्वर, फुलकाही, मानराजा, खडकपुर, काचन, देउरी, धनगढी (१–८) र नेगडा गरी कुल ५८ दशमलव ९३ वर्ग्किलोमिटर क्षेत्रमा रहेको नगरपालिकामा ४३ हजार २२९ जनसंख्या रहेको छ ।