चितवन - चितवन राष्ट्रिय निकुञ्जको मुख्य कार्यालय कसरास्थित खोरमा राखिएको दुर्लभ पाटेबाघ मंगलबार मरेको छ । 

दाहिने खुट्टाको पञ्जामा लागेको चोटका कारण इन्फेक्सन भएर पाटेबाघ मरेको निकुञ्जका वरिष्ठ पशु चिकित्सक डा कमल गैरेले जानकारी दिनुभयो । 

करीब १०–११ वर्षको त्यो बाघलाई तीन महिनाअघि पूर्वी चितवनको खगेन्द्रमल्ली रेञ्जपोष्टअन्तर्गत पर्ने राप्ती एकता मध्यवर्ती सामुदायिक वनबाट उद्धार गरी खोरमा ल्याएर राखिएको थियो । 

“हिजोसम्म राम्ररी मासु खाँदै थियो”, निकुञ्जका प्रमुख संरक्षण अधिकृत बेदकुमार ढकालले भन्नुभयो, “आज मासु हाल्न जाँदा मरेको भेटियो ।” आठ–दश दिनदेखि बिरामी परेको बाघलाई पशुचिकित्सक डा कमल गैरेको नेतृत्वको टोलीले उपचार गरिरहेको भए पनि सफल हुन नसकेको ढकालको भनाइ छ । 

बाघले त्यस क्षेत्रमा करीब २० वटा जति पशुवस्तु खाएको थियो भने एक जना मानिसलाई समेत आक्रमण गरी घाइते बनाएपछि निकुञ्जले नियन्त्रणमा ल्याएर खोरमा राखेको थियो ।