नेपालगञ्जमा मासिँदै छहारी : ३ वर्षमा १४ सय बढी रुख ढालियो

 जेठ १४, २०७५ | गोविन्द शर्मा
unn.prixa.net

नेपालगञ्जमा भौतिक निर्माणसँगै रुख ढाल्ने क्रम पनि बढेको छ । सडक ढललगायत निर्माणका क्रममा रुख ढालिएको तर ३ वर्षसम्म विरुवा नरोपिएकोमा नगरवासी आक्रोशित भएका छन् । 

झण्डै तीन वर्षदेखि निर्माण कार्यले गति लिएसँगै वर्षौँ पुराना रुखहरु धमाधम काट्ने क्रम पनि बढेको तर विरुवा नरोपिएपछि नेपालकै सबैभन्दा बढी गर्मी हुने नेपालगञ्जका नगरबासी आक्रोशित भएका हुन् ।

एशियाली विकास बैंकको सहयोगमा नेपालगञ्जमा चार लेनको सडक निर्माण सम्पन्न भयो । त्यस्तै, ढल निकाससँगै भित्री सडकको निर्माण भइरहेको छ ।

चार लेन सडक निर्माण गर्दा सडक किनारमा रहेका अशोक, गोल, मोहर, जामुन तथा स्थानीय बासिन्दाले रोपेर संरक्षण गरेर हुर्काएका वर, पिपलसहित १ हजार ४ सय ३७ वटा रुख काटिएका छन् । 
तर तीन वर्षसम्म पनि उपमहानगरपालिकाले बिरुवा रोपेको छैन । हरियाली नहुँदा कम तापक्रममा पनि धेरै गर्मी महसुस हुन थालेको नेपालगञ्जका बासिन्दाको अनुभव छ । 

पछिल्लो पटक नेपालगञ्जको धम्बोझीमा सडक र नाली निर्माण गरिदा सिमलको रुख ढालिएपछि सामाजिक सञ्जालमा यसको चर्को आलोचना भएको छ । सामाजिक अभियन्ता हेमन्त काफ्लेले मानवीय स्वास्थ्यका लागि रुखहरुको संरक्षण गर्दै विकास गर्नुपर्ने बताउनुभयो ।

नेपालगञ्जमा नागरिक समाजको अगुवाईमा हरित नेपालगञ्ज अभियान सञ्चालन भईरहेको छ भने नेपालगञ्ज उपमहानगरपालिका विकासको नाममा बर्षौदेखि  हुर्काइएका रुखहरु ढालिरहेको छ ।

रुखहरु ढालिएपछि चर्को गर्मीमा शितल छहारी बस्ने ठाउँ अभाव भएको कारकादौंका रिक्साचालक मङ्गल थारुले बताउनुभयो । ‘पहिले सुर्खेतरोडमै रुखको छहारी हुन्थ्यो, उहाँले भन्नुभयो,– अहिले रुख खोज्न टाढा गाउँमा जानुपर्ने अवस्था आएको छ ।’

नेपालगञ्ज उपमहानगरपालिकाका प्रमुख डा. धवलशम्शेर राणाले निर्माण कार्य गरिदा बीच सडक र नालीमा परेका रुखहरु काट्नुपर्ने बाध्यता भएको बताउनुभयो । उहाँले यो वर्षायामदेखि नै यसअघि एउटा रुख काटेको ठाउँमा १० वटा रुख रोप्ने तयारी गरिएको दावी गर्नुभयो । 

 

गोविन्द शर्मा

बाँकेका उज्यालो सहकर्मी गोविन्द शर्मालाई फेसबुकमा भेट्न सकिन्छ ।

तपाईको प्रतिक्रिया