धनुषा – पछिल्लो २४ घण्टामा प्रदेश २ मा ८३ जनामा कोरोना सङ्क्रमण पुष्टि भएसँगै कुल सङ्क्रमितको सङ्ख्या एक हजार ६६ पुगेको छ ।

शनिबार नियमित मिडिया ब्रिफिङमा सामाजिक विकास मन्त्रालयका सचिव डाक्टर रामप्रसाद घिमिरेले पछिल्लो २४ घण्टामा सप्तरीमा सात, धनुषामा आठ, महोत्तरीमा ३५, रौतहटमा ६ र सर्लाहीमा २७ जनामा सङ्क्रमण पुष्टि भएको जानकारी दिनुभयाे । 

सप्तरीको बलान बिहुल गाउँपालिकाको क्वरेण्टीनमा रहेका सात जना, धनुषाको देवपुरा रुपैठाको क्वरेण्टीनमा रहेका ६ जना, महोत्तरीको जलेश्वर क्वरेण्टीनका १७, मटिहानीमा सात, एकडाराका ६ र अन्य पाँच जनामा सङ्क्रमण पुष्टि भएको उहाँले जानकारी दिनुभयो ।

सर्लाहीको रामनगर गाउँपालिकाका १६, मलङ्गवा नगरपालिकाका आठ, इशरनाथ नगरपालिकाका तीन, रौतहटको इशनाथ नगरपालिकाकाे क्वरेण्टीनका ६ जनामा कोरोना सङ्क्रमण पुष्टि भएको जनाइएको छ । प्रदेशमा सङ्क्रमितको सङ्ख्या बढ्दै जाँदा अहिलेसम्म एक सय ५९ जना उपचारपछि निको भएर फर्केका छन् ।

धनुषाको प्रादेशिक अस्पताल अन्तर्गतको कोभिड विशेष अस्पतालमा १०, लक्ष्मिनियाँ गाउँपालिकाको सीटीईभीटी पाेलिटेक्निक इन्स्च्यिुटको आइसोलेशनमा ७३, सप्तरीको राजविराजको अस्पतालमा ६८, सिरहाको कोभिड अस्पतालमा २२, महेन्द्र गेनाई अस्पतालमा २६, सर्लाहीको मलङ्गवा अस्पतालमा ८२ र कविलासीमा ३६ जनाको आइसोलेशन कक्षमा उपचार भइरहेको छ ।

महोत्तरीको जलेश्वर अस्पतालमा ३७, बाराको कलैया अस्पतालमा ३३, पर्साको गण्डक अस्पतालमा २९ र रौतहटको चन्द्रनिगाहपुरमा २५, गौरमा ३५, राजपुर फरहदवामा २५, देवाही गोनाहीमा ८४ र गरुडाको अस्पतालमा ७६ जनाको कोरोना सङ्क्रमितको आइसोलेशन कक्षमा उपचार भइरहेको छ ।

अहिलेसम्म प्रदेश २ का सप्तरीमा ७६, सिरहामा ४७, धनुषामा एक सय, महोत्तरीमा ८७, सर्लाहीमा एक ७६, रौतहटमा तीन सय ९६, बारामा ४९ र पर्सामा एक सय १४ जना सङ्क्रमित भइसकेका छन् ।

प्रदेशमा अहिलेसम्म २१ हजार १६ जनाको पीसीआर परीक्षण गरिएकोमा एक हजार ६६ जनाको पोजेटिभ र ११ हजार दुई सयको निगेटिभ रिपोर्ट आएको छ भने आठ हजार सात सय ५० को रिपोर्ट आउन बाँकी रहेको डा. घिमिरेले जानकारी दिनुभयाे ।

त्यसैगरी आरडीटी परीक्षणतर्फ नाै हजार नाै सय ३९ जनाकाे परीक्षण गरिएकोमा ३६ जनाको पोजेटिभ र बाँकीको निगेटिभ रिपाेर्ट आएको बताइएको छ ।