काठमाडौं - सर्वोच्च अदालतका कायम मुकायम प्रधानन्यायाधीश दीपकराज जोशीले आफ्नो शैक्षिक प्रमाणपत्रमाथि स्वतन्त्र छानविन गर्न माग गर्नुभएको छ ।

संसदीय सुनुवाई विशेष समितिले शैक्षिक प्रमाणपत्र विवादास्पद रहेको लगायतका कारण देखाउँदै प्रधानन्यायाधीशमा अस्वीकृत गरेपछि जोशीले यसको पुष्टि गर्न चुनौती दिनुभएको हो ।

आफ्नो शैक्षिक प्रमाणपत्रहरु आधिकारिक निकायबाट अध्ययन अनुसन्धान नै नगरी निर्णय गर्दा आफू अन्यायमा परेको उहाँको दाबी छ ।

शनिबार विज्ञप्ति निकालेर उहाँले आफूले प्रवेशिका परीक्षा दिँदा दुईवटा बोर्ड रहेको भन्दै यसअघि काम गर्दा शैक्षिक प्रमाणपत्रबारे प्रश्न नउठेको उल्लेख गर्नुभएको छ । अहिले नियतबश आफूलाई अन्यायमा पारिएको उहाँको भनाई छ । 

सुनुवाई समितिले आफ्नो प्रमाणपत्रबारे शंकाकै भरमा निर्णय गरेको उहाँले उल्लेख गर्नुभएको छ । ‘मेरा प्रमाणपत्रबारे स्वतन्त्र निकायबाट छानविन गरी सत्य पत्ता लगाउन संवैधानिक परिषद् र सरकारबाट उचित कदम चालिनेछ भन्ने अपेक्षा सार्वजनिक गरेको छु’ विज्ञप्तिमा भनिएको छ ।