सम्पदा बस्ती मौलिक स्वरुपमा पुनर्निर्माण गरिने

 भदौ २९, २०७५ शुक्रवार १६:५५:१ | उज्यालो सहकर्मी
unn.prixa.net

काठमाडौं – राष्ट्रिय पुननिर्माण प्राधिकरणले काठमाडौं उपत्यका भित्रका खोकना, बुङमती, सांखु, किलागल जस्ता सम्पदा बस्ती र उपत्यका बाहिरका नुवाकोट, गोरखाका दरबार क्षेत्र एवं दोलखाको भीमसेन बजार जस्ता क्षेत्रहरुमा परेका बस्तीहरुको पुनर्निर्माण गर्दा बस्तीको मौलिक स्वरुपलाई कायम गर्ने गरी पुनर्निर्माण गर्ने निर्णय गरेको छ । 

सम्पदा बस्तीमा आवश्यक पर्ने बाटो, खानेपानी, ढल निकास लगायतमा पूर्वाधारहरुको पुनर्निर्माण गर्नका लागि सरकारले प्राधिकरण मार्फत नै लगानी गर्ने निर्णय पनि गरेको छ । त्यस्ता बस्तीहरुमा रहेका निजी आवास पुनर्निर्माण गर्नुपर्ने घरधनीलाई मौलिक÷पुरातात्विक शैलीमा पुनर्निर्माण गर्न थप ५० हजार रुपैयाँ अनुदान उपलब्ध गराउने निर्णय पनि बैठकले गरेको छ ।

त्यसैगरी, कार्यकारी समितिले २ वा २ भन्दा बढी घरधनीले संयुक्त स्वामित्वमा घर निर्माण गर्न चाहेमा संयुक्त स्वामित्वका आधारमा घरधनीको संख्या गणना गरी अनुदान रकम उपलब्ध गराउने समेत निर्णय गरेको छ । 

साथै, काठमाडौं उपत्यका भित्रका बस्तीहरुमा लाभग्राही सूचीमा परेका घरहरुको पुनर्निर्माण गर्दा जोडिएको घर भत्कने स्थिति भए घरधनीलाई समेत लाभग्राही सूचीमा समावेश गरी अनुदान रकम दिने निर्णय भएको प्राधिकरणका प्रमुख कार्यकारी अधिकृत सुशील ज्ञवालीले बताउनुभयो ।

अन्तिम अपडेट: असोज ३, २०७५

तपाईको प्रतिक्रिया