दैलेख – कर्णाली प्रदेशका आर्थिक मामिला तथा योजना मन्त्री प्रकाश ज्वालाले जनप्रतिनिधिहरुले व्यक्तिगत लोभ र मोह त्याग्न आग्रह गर्नुभएको छ । 

जिल्ला समन्वय समिति दैलेखले आयोजना गरेको वार्षिक समीक्षा कार्यक्रममा उहाँले जनप्रतिनिधिले ठेकेदारी होइन जनताको काम गर्नुपर्ने सुझाव दिनुभयो । 

मन्त्री ज्वालाले डोजर किन्ने र आफ्नै स्थानीय तहका सडक खन्ने ठेक्का लिँदा जनताले पार्टीलाई प्रश्न गरेका र सम्पूर्ण जनप्रतिनिधिहरुलाई दाग लागेको टिप्पणी गर्नुभयो । ‘पार्टी र जनताले गरेको विश्वासमा खेलबाड गर्न तपाईंहरुलाई छुट छैन’ उहाँले सचेत गराउनुभयो ।

जिल्ला समन्वय समितिका प्रमुख प्रेमबहादुर थापाको सभापतित्वमा भएको कार्यक्रममा दैलेखका ११ वटै स्थानीय तहले आर्थिक वर्ष २०७४÷०७५ मा भए गरेका विकास गतिविधि र कार्य प्रगतिकोे जानकारी दिनुभएको थियो । 

वार्षिक समीक्षा कार्यक्रममा कर्णाली प्रदेशका सांसदहरु अम्मरबहादुर थापा, हिमबहादुर शाही, कर्णाली प्रदेशका आर्थिक मामिला तथा योजना मन्त्रालयका सचिव ढुण्डीप्रसाद निरौला र नेपाली काँग्रेसका जिल्ला कोषाध्यक्ष पूर्णबहादुर खत्रीले बोल्नुभएको थियो ।