बैतडी – दसैँ आउनै लाग्दा समेत बैतडीका विभिन्न कार्यालयका कर्मचारीहरुले तलब पाउन सकेका छैनन् ।

प्रदेश मातहत आएका कार्यालयहरुबाट तलब पाउन नसकेको कर्मचारीहरुले बताएका छन् । गएको साउनदेखि अहिलेसम्म तलब नपाएको कृषि ज्ञान केन्द्र बैतडीका निमित्त कार्यालय प्रमुख कर्णबहादुर चन्दले जानकारी दिनुभयो ।

साविकको जिल्ला कृषि विकास कार्यालयका कर्मचारीहरुले तलब पाउन नसकेको उहाँले बताउनुभयो । तलबकै विषयमा बुझ्न आफू धनगढी पुगेको र अहिले तलब निकासा हुने छाँटकाँट नदेखिएको उहाँको भनाई थियो ।

दसैँको मुखमा तलब नपाउने चिन्तामा रहेको कृषि ज्ञान केन्द्र बैतडीका जेटीए महेश अवस्थीले बताउनुभयो । यस्तै प्रदेश सरकार मातहत स्थापना भएको भेटनरी अस्पताल तथा पशु सेवा विज्ञ केन्द्रका कर्मचारीहरुले पनि गएको साउनदेखि तलब नपाएको त्यस कार्यालयका पशु प्राविधिक बिसनसिंह बिष्टले जानकारी दिनुभयो । 

डिभिजन वन कार्यालयका कर्मचारीहरुले पनि साउनदेखि तलब नपाएको डिभिजन वन अधिकृत प्रभात सापकोटाले बताउनुभयो । चाडपर्वको समय नजिक आए पनि तलब पाउने छाँटकाँट नदेखिएपछि कर्मचारीहरु चिन्तित बनेका छन् ।