लमजुङ – ठाडोभाका शिरोमणि स्वर्गीय भेँडीखर्के साहिँलाको शालिक अनावरण गरिएको छ ।

लमजुङ सुन्दरबजार नगरपालिका–६, मा रहेको लक्ष्मीनारायण मन्दिर परिसरमा उहाँको शालिक अनावरण गरिएको हो । आइतबार राष्ट्रिय गानका रचायिता प्रदीपकुमार राई ‘ब्याकुल माइला’ले स्वर्गीय साहिँलाको शालिकको अनावरण गर्नुभएको हो ।

उहाँले मौलिक कला, गीतसंगीतको जगेर्ना गर्नुपर्ने बताउनुभयो । श्रष्टाको योगदान कहिल्यै भुल्न नहुने उहाँको भनाई छ । ठाडोभाका संरक्षणमा साहिँलाको उच्च योगदान रहेको उहाँले बताउनुभयो ।   

भेँडीखर्के साहिँला समृति प्रतिष्ठान लमजुङ सुन्दरबजारको पहल तथा विभिन्न सहयोगी व्यक्ति तथा संघसंस्थाको सहयोगमा साहिँलाको शालिक निर्माण गरिएको हो । 

आजीवन ठाडोभाका संरक्षणमा लाग्नुभएका साहिँलाको योगदानको उच्च कदर गर्नुका साथै उहाँको सम्झनामा शालिक ठड्याइएको भेँडीखर्के साहिँला स्मृति प्रतिष्ठान लमजुङका अध्यक्ष शम्शेरबहादुर लौडारीले बताउनुभयो ।

साहिँलाको शब्द चयन र लयबद्ध रुपमा गाउन सक्ने क्षमतालाई ईश्वरकै वरदान ठान्नुहुन्छ, ठाडोभाका संरक्षणमा लाग्नुभएका तार्कु खहरे विष्णुभक्त अधिकारी । ‘भेँडीखर्के साहिँलाको गाउने कला र गलाको बयान गरिसाध्य छैन । उहाँको गायकी इश्वरको बरदान नै हो भन्छु म,’ उहाँले भन्नुभयो, ‘साहिँलाको योगदान कसैले कहिल्यै भुल्नु हुँदैन ।’

युवा पुस्ता जुट्नुपर्ने  

विशेषगरी : दूरा गुरुङ सुमदायको सँस्कृति मानिन्छ, ठाडोभाका । तर यसलाई आजसम्म जोगाइराखे एक ब्राह्मणका छोरा दीर्घराज अधिकारी अर्थात भेँडीखर्के साहिँलाले ।

लोपान्मुख मौलिक ठाडोभाका संरक्षण जनजाति समुदायका साथै नयाँ पुस्ता जुट्नु आवश्यक रहेको दूरा सेवा समाज सुन्दरबजारका उपाध्यक्ष चन्द्रबहादुर दूरा बताउनुहुन्छ ।    

मौलिक लोपान्मुख ठाडोभाका संरक्षणमा नयाँ पुस्ता जुट्नुको विकल्प नरहेको स्थानीय युवा ज्ञानेन्द्र शर्माले बताउनुभयो । विसं १९९० भदौ २९ गते बुबा बलभद्र अधिकारी र आमा नन्दकुमारी अधिकारीको कोखबाट साबिक सिन्दूरे गाविस–६, दुराडाँडा लमजुङमा जन्मिनुभएको हो, साहिँला । साहिँलाको २०७४ साल भदौ २६ गते निधन भएको हो ।      
 

शालिक अनावरणकै अवसरमा ठाडोभाका समेत प्रस्तुत गरिएको थियो । साहिँलाको शालिक बनाउँदैमा शालिकमा फुलपाती चढाउँदैमा उहाँको सम्मान नहुने बताउँदै मौलिक ठाडोभाका जोगाउन सके मात्रै स्व. भेँडीखर्के साहिँलाको आत्माले शान्ति पाउने सरोकारवालाहरु बताउँछन् ।