आज तिहारको चौथो दिन, गाई, गोरुको पूजा गरिँदै

 कात्तिक २२, २०७५ बिहिबार ११:२४:५८ | उज्यालो सहकर्मी
unn.prixa.net

तस्बिर सामाजिक सञ्जाल

काठमाडौं – तिहारको चौथो दिन आज गाई, गोवर्द्धन र गोरुको पूजा गरी मनाइँदैछ । गाईलाई पवित्र मानेर पूजा गर्ने वैदिक सनातन कालदेखिको विधि हो ।

गाईले दिने दूध आमाले खुवाएको दूध जत्तिकै पौष्टिक हुने भएकाले गाईलाई हिन्दुधर्मावलम्बीले गौमाता भनेर सम्मान गर्छन । स्थानीय जातका गाईमा हुने जुरोले सूर्य र चन्द्रमाबाट ऊर्जा लिई दूध, गहुँत र गोबरका माध्यमबाट मानिसमा शक्ति दिने भएकाले गाईको महत्व रहेको विज्ञानले पनि प्रमाणित गरेको छ ।

आज गाईको पूजा गरी मिठामिठा परिकार खान दिए गाईबाट पाइने शुद्धता सधैँ प्राप्त हुने धार्मिक विश्वास छ । आज गाई पूजा गरी साउन शुक्ल पूर्णिमाका दिन बाँधिएको रक्षाबन्धन गाईको पुच्छरमा बाँधिदिएमा मृत्युपश्चात गाईले स्वर्ग जानका लागि वैतरणी नदी तारिदिने विश्वास हिन्दु धर्मावलम्बीहरुले गर्ने गरेका छन् । 

नेपालका केही ठाउँ र केही समुदायमा कात्तिक कृष्ण औँसीकै दिनमा गाई पूजा गर्ने परम्परा रहे पनि औँसीको अन्त्य र प्रतिपदाको शुरुमा गाई पूजा गर्नुपर्ने शास्त्रीय मान्यता रहेको नेपाल पञ्चाङ्ग निर्णायक समितिका अध्यक्ष रामचन्द्र गौतमले जानकारी दिनुभयो ।

यस्तै वर्षभरी जोतिएर मानव हितका लागि सेवा गर्ने गोरुलाई पनि आज पूजाआजा गरी मिठामिठा खानेकुरा खान दिने प्रचलन छ । आज किसान र हलीलाई पनि पूजा गर्ने गरिन्छ ।

आज आँगनमा लिपपोत गरी गाईको गोबरको पर्वत बनाई त्यसलाई गोवद्र्धन पर्वत मानेर पूजा गर्ने गरिन्छ । द्वापर युगमा श्रीकृष्णले हत्केलाले गोवद्र्धन पर्वत उचाली गोकुलवासीलाई मुसलधारे वर्षाबाट बचाएको सम्झनामा गोवद्र्धन पर्वतको पूजा गर्न थालिएको मानिन्छ । 

अन्तिम अपडेट: चैत १३, २०८०

तपाईको प्रतिक्रिया