कोदोबालीको विषयमा अन्तर्राष्ट्रिय बहस हुँदै
चैत १६, २०८० शुक्रबार
युएई – युएईमा कोमामा उपचाररत एक नेपालीलाई स्वदेश फर्काइएको छ । दुई महिनादेखि दुवईको रसिद अस्पतालमा कोमामा उपचाररत ताप्लेजुङ स्थायी घर भएका मोरङको रतुवामाई नगरपालिका बस्ने जितबहादुर लिम्बुलाई नेपाली दूतावास युएई र विभिन्न संस्थाको पहलमा स्वदेश फर्काइएको हो ।
युएईमा उडान भर्दै आएका नेपालका एयरलाइन्समा जटिल प्रकृतिका बिमारी बोक्ने सुविधा नभएपछि जितबहादुरलाई एयर इन्डिया मार्फत शनिबार राति दिल्ली हुँदै नेपाल लगिएको हो ।
नेपालमा न्युरो कार्डियो सर्जरी अस्पतालमा राखेर थप उपचार गरिने जितबहादुरलाई सहयोग गर्न चलाइएको अभियानका संयोजक भवानी माङ्गमु लिम्बुले जानकारी दिनुभयो ।
सन् २०१५ मा युएई आएका लिम्बु गएको अगस्टमा बेहोस भएपछि उहाँलाई अस्पताल भर्ना हुनुभएको थियो । ब्रेन हेमरेज (मस्तिष्कमा रगत जम्नु) भएका कारण जितबहादुर कोमामा पुग्नुभएको हो ।
काम गर्दै आएको कम्पनी साहुले अर्कै कम्पनीलाई बेचेपछि जितबहादुर लगायत अरु कामदारको बाँकी तलब, नयाँ भिसा र मेडिकल इन्सुरेन्ससम्म बनाइदिने सर्तमा फेरि त्यही कम्पनीमा काम गर्दै आएका थिए । तर सन् २०१७ मा करार अवधी सक्किएपछि जितबहादुर गैरकानुनी हुनुभएको थियो ।
युएईमै कार्यरत जितबहादुरका ज्वाईं गंगालाल लिम्बुका अनुसार, उहाँ दुवई फिनिसिङ कार्पेन्टरको काम गर्नुहुन्थ्यो ।
युएई आएको केही समयपछि कम्पनीले जितबहादुरलाई तलब दिन छाड्यो । तलब दिलाइदिन अनुरोध गर्दै उहाँ लेबर कोर्ट पनि पुग्नुभएको थियो ।
गएको अगष्ट १६ तारिख बिहान ड्युटी जान खोज्दा उहाँलाई अचानक चक्कर लाग्यो । त्यो दिन काममा नगई कोठामा आराम गरेर बस्नुभयो । साँझ कामबाट फर्किएका साथीहरुले बेहोस अवस्थामा भेटेपछि उहाँलाई अस्पतालमा पुर्याएका थिए । साथीहरुको सहयोगमा अस्पताल भर्ना गरियो ।
चिकित्सकले उहाँको ब्रेन हेमरेज भएको बताएका छन् । दुईसाता आइसीयुमा राखेर उपचारपछि उहाँलाई एक महिना नर्मल कोमामा राखिएको थियो । स्वास्थ्यमा पहिलेको भन्दा केही सुधार आएपछि १५ दिन यता वार्डमा अर्धचेत अवस्थामा उपचार भैरहेको छ ।
उहाँ अहिले पनि बोलचाल गर्न सक्दैनन् । यहा थप उपचार गराउनु भन्दा नेपाल लैजान चिकित्सकले सुझाव दिए । तर अवैधानिक अबस्थामा रहेका उनलाई नेपाल फर्काउन कानुनी समस्या भयो ।
जनप्रगतिशील मोर्चाका उपाध्यक्ष कमल पोखरेलले बिरामीलाई नेपाल लैजान आवश्यक पर्ने कागजातको लागि दूतावाससँग समन्वय गर्नुभएको थियो ।
दूतावासका श्रम काउन्सुलर भेषबहादुर कार्की र जनसम्पर्क अधिकृत इरफान आलमले जितबहादुर उपचाररत अस्पतालमा गएर उनको स्वास्थ्य अवस्थाको जानकारी लिए ।
उनको उपचारमा लागेको खर्च चुक्ता नगरेसम्म अस्पतालले नेपाल लैजान नसक्ने जनाएको थियो । यसबिचमा दूतावासको पहलमा उनको उपचारमा लागेको १ लाख ६० हजार दिर्हाम उपचार खर्च छुट भयो ।
यस्तै बिरामीलाई नेपालसम्म पुर्याउन आवश्यक सहयोगका लागि दूतावासले परराष्ट्र र श्रम मन्त्रालय र वैदेशिक रोजगार प्रवद्र्धन बोडलाई जानकारी गराएको थियो ।
त्यसपछि बिमारीलाई नेपालमा राख्ने अस्पतालको स्वीकृतिका आधारमा यहाँको अस्पतालले एकजना नर्सको समेत व्यवस्था गरी उहाँलाई नेपाल लैजाने अनुमति दिएको दुतावासका श्रमसहचारी मोतिराम भुषालले बताउनुभयो ।
जितबहादुरलाई नेपाल फर्काउन वैदेशिक रोजगार प्रवद्र्धन बोर्डमा आग्रह गरिएपनि गैरकानुनी रुपमा काम गर्ने नेपालीका लागि आर्थिक सहयोग गर्ने नीति नभएको भन्दै बोर्डले कुनै सहयोग नगरेको गंगालालले बताउनुभयो ।
सरकारको सहयोग नभएपछि उहाँले युएईका विभिन्न संघसंस्थासँग आर्थिक सहायतका लागि अनुरोध गर्नुभएको थियो । गंगालालकै अनुरोधमा ताप्लेजुङ समाज सेवा युएई र जनप्रगतिशील मोर्चाको पहलमा आर्थिक सहयोग अभियान चलाइएको थियो ।
समितिले ताप्लेजुङ समाज सेवा युएईका महासचिव भवानी माङ्गमु लिम्बुको संयोजकत्वमा युएईमा रहेका २५ भन्दा धेरै संस्था र व्यक्तिसँग सहकार्य गरी २० हजार १ सय ६३ दिर्हाम संकलन गरेको ताप्लेजुङ सेवा समाजकी अध्यक्ष सोनी भण्डारीले जानकारी दिनुभयो ।
जितबहादुरलाई नेपाल फर्काउन १७ हजार ८ सय ८३ दिहराम खर्च भएको र २ हजार २ सय ८० दिर्हाम बचत भएको समाजले जनाएको छ । बचत भएको रकम बिरामीको सहयोगार्थ खोलिएको खातामा जम्मा गरिएको अध्यक्ष भण्डारीले जानकारी दिनुभयो ।
उज्यालाे सहकर्मी उमाकान्त पाण्डे युएईमा बसेर पत्रकारिता गर्नुहुन्छ।