भारतीय नोट नचल्ने भएपछि सुदूरपश्चिमवासीलाई समस्या

मंसिर २९, २०७५ शनिबार १७:४७:४५ | विमल बिष्ट

डोटी – सुदूरपश्चिम प्रदेशका पहाडी जिल्लामा भारतीय नोटहरु नसाटिँदा स्थानीयलाई समस्या भएको छ ।

सरकारले एकाएक भारतीय २ सय, ५ सय र २ हजारका नोटहरु नचलाउने निर्णय गरेपछि सुदूरपश्चिम प्रदेशका स्थानीयवासी समस्यामा परेका हुन् । कामका लागि भारतका विभिन्न शहर गएका सुदूरपश्चिम प्रदेशका स्थानीयहरुले घर फर्किँदा ल्याएका भारतीय नोटहरु अहिले नसाटिने भएपछि उनीहरु निकै समस्यामा परेको डोटीका स्थानीय चेतराज भट्टले बताउनुभयो ।

‘भारत गएकाहरुले पुरै भारतीय नोट ल्याएका छन् । सरकारले नसाट्ने भनेपछि समस्या भएको छ’, उहाँले भन्नुभयो, ‘हामीले कमाएर ल्याएको सम्पति काहाँ गएर साट्ने ।’ त्यस्तै दिपायलको पिपल्लामा रहेको किरण इलेक्ट्रोनिकका प्रोपाइटर किरण भण्डारीले आफू कहाँ दैनिक दजनौं ग्राहकहरु भारु रुपैयाँ लिएर आउने गरेको बताउनुभयो ।

‘कुनै पनि सामान किन्दा भारु रुपैयाँ दिन्छन्, सरकारले चल्दैन । भारु भनेको छ, दैनिक ग्राहक फर्काउनु परेको छ’, उहाँले भन्नुभयो, ‘केही चिनेजानेका व्यक्तिले भारु साटिए नेपाली नोट दिनु होला भनेर रकम छोडेर गएका छन् । कहाँ गएर साट्नु आफै अलमलमा परेको छु ।’

सुदूरपश्चिमका अधिकांश स्थानीयहरु कामका लागि भारत जाने र उनीहरुले त्यहाँ कमाएको रकम भारतीय रुपैयाँ नै ल्याउने गरेका कारण यहाँको प्रदेशमा बढी जसो भारतीय रुपैयाँको कारोबार हुने गरेको दिपायलका अर्का स्थानीय तथा पूर्व नगर प्रमुख घनश्याम पाठकले बताउनुभयो ।

उहाँले भन्नुभयो, ‘हाम्रो प्रदेशका अधिकांश जिल्लाहरुमा प्रायः भारतीय रुपैयाँको कारोबार हुन्छ । सरकारले त्यही भारतीय रुपैयाँ नचल्ने भनेपछि समस्या त हुने नै भयो नि ।’ सुदूरपश्चिम प्रदेशका बैतडी, अछाम, बझांङ, बाजुरा, दार्चुला, कैलाली, कञ्चनपुर तथा डोटीका स्थानीयवासीहरु प्रायः कामका लागि भारत जाने गर्दछन् । यहाँका कतिपय जिल्लाहरुमा त नेपाली नोट भन्दा पनि भारतीय नोटको बढी कारोबार हुँदै आएको स्थानीयवासीहरु बताउँछन् ।

बजारमा भारतीय रुपैयाँ चल्न छाडेपछि यहाँको व्यापार व्यवसायमा पनि निकै कमी आएको दिपायल पिपल्लाका स्थानीय व्यापारी तुलसी शाहीले बताउनुभयो । उहाँले भन्नुभयो, ‘अधिकांश ग्राहक भारतीय रुपैयाँ लिएर सामान किन्न आउछन् । सरकारले नचल्ने भनेपछि हामीले भारु रुपैयाँमा सामान दिँदैनौं । सामान नदिँदा व्यापार घटेको छ ।’

डोटीका प्रमुख जिल्ला अधिकारी यादव सुवेदीले कानुनी रुपमा नसाट्ने भनिएको भारतीय रकम कही कतै साट्न नहुने बताउनुभयो । ‘कानुनले नसाट्नु भनेको रकम साट्नु वा चलन चल्ति गर्नु भनेको गैरकानुनी हो’, उहाँले भन्नुभयो, ‘गैरकानुनी रुपमा नेपालमा रकम साट्नुभन्दा बरु भारत तिरै लगेर साट्न उपयुक्त होला ।’

अन्तिम अपडेट: मंसिर ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

विमल बिष्ट

विमल बिष्ट डोटीका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्