कोरियाबाट फर्किएकाले ट्रेकिङ गाइडको काम पाउने

पुष ८, २०७५ आइतबार १४:१२:२० | मोहन पौडेल

काठमाडौं – वैदेशिक रोजगारीका लागि कोरिया गएका नेपाली कामदारले नेपाल फर्किएपछि ‘ट्रेकिङ गाइड’को काम पाउने भएका छन् । कोरियाबाट फर्किएका कामदारलाई समाजमा पुनस्र्थापना गर्न सघाउने गरी दक्षिण कोरिया सरकारले उनीहरुलाई ट्रेकिङ गाइडको काम दिलाउन सघाउने भएको हो ।

तीन वर्षअघि सन् २०१५ मा गरिएको सर्वेक्षणले कोरियाबाट फर्किएका कामदारको पहिलो रोजाईमा ट्रेकिङ गाइडको काम देखाएपछि कोरियाको मानव संशाधन विभागले यसमा नेपाल सरकारलाई सघाउने भएको हो ।

आउँदो बुधबार नेपालका र कोरियाका संस्थाबीचमा सहयोग सम्बन्धी सम्झौतामा हस्ताक्षर हुने भएको छ । कोरिया मानव संशाधन विकास सेवा केन्द्र (एचआरडी कोरिया) ले विश्व ओक्टा, कोरिया टुर्स एण्ड ट्रेकिङ अपरेटर एसोसिएसन अफ नेपाल, कोरिया साउथ इष्ट पावर कम्पनी र युएम अमहोङगील ह्युमन फाउण्डेसनसँग समन्वय गरी काम उपलब्ध गराउने जनाएको छ ।

नेपाल पर्यटन बोर्डको तथ्याङ्कले सन् २०१७ मा ३४ हजार ३ सय १ जना दक्षिण कोरियाका नागरिक नेपाल घुम्न आएको देखाएको छ । सन् २०१५ मा १८ हजार १ सय १२ आएकोमा हरेक वर्ष सङ्ख्या बढिरहेको र कोरियाबाट फर्किएका कामदारको रुची पनि ट्रेकिङ गाइड भएकाले यस्तो सम्झौता गर्न लागिएको एचआरडी कोरियाले जनाएको छ ।

एचआरडी कोरियाले ४ वर्षभन्दा बढी कोरियामा बसेर त्यहाँको संस्कृति राम्ररी बुझेका र कोरियन भाषा परीक्षा इपीएस तेस्रो श्रेणीभन्दा माथिल्लो श्रेणी ल्याएकाहरुलाई कोरिया टुर्स एण्ड ट्रेकिङ अपरेटर एसोसिएसन फर नेपालमा कामका लागि सिफारिस गर्नेछ ।

यही सिफारिसका आधारमा कोरिया टुर्स एण्ड ट्रेकिङ अपरेटर एसोसिएसन अफ नेपाललेले सिफारिश पाएका कामदारको समूहलाई ट्रेकिङ् गाईडको काम भएका बेला समन्वय गरी रोजगारी दिने छ । यस्तै फर्किएका कामदारलाई नेपालमै रहेका कोरियन कम्पनीहरुमा काम दिलाउन वल्र्ड ओक्टा नेपाल शाखाले मध्यस्थकर्ताको काम गर्ने भएको छ ।

कोरिया साउथ इष्ट पावर कम्पनीले फर्किएका कामदारहरुलाई दिगो रोजगारीमा लाग्न सक्ने गरी सघाउने छ । एचआरडी कोरियाले यो सम्झौता कार्यान्वयनका लागि नेपाल सरकारलाई पनि अनुरोध गर्ने भएको छ । दक्षिण कोरियाको कम्पनीमा ९ वर्ष ८ महिना काम गरेपछि आफ्नो देश फर्किनुपर्ने व्यवस्था छ ।

फर्किएका कामदारका लागि विभिन्न शिक्षा र प्रशिक्षण, स्वेच्छिक स्वदेश फिर्तीबारे जानकारीमुलक कार्यक्रम, स्वदेश फर्किएपछि सफल भएका कामदारलाई कोरियामा निमन्त्रणा गरी प्रेरणादायी भेला, कोरियन कम्पनीहरुसँग बैठक, कामदार र कम्पनीहरुको लागि मध्यस्थकर्ता कार्यक्रम गरिरहेको पनि एचआरडी कोरियाले जनाएको छ ।

(यसअघि टुरिष्ट गाइड भएकोमा हामीले सच्याएका हौं ।)

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

मोहन पौडेल

मोहन पौडेलसँग भुटानी तथा तिब्बती शरणार्थीका विषयमा लामो समय रिर्पोटिंग गरेको अनुभव छ । उहाँ वैदेशिक रोजगारका विभिन्न पाटामा पनि कलम चलाउनु हुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्