भेरी–बबई सुरुङको ‘ब्रेक थ्रु’, प्रधानमन्त्रीले औपचारिक घोषणा गर्ने

चैत २४, २०७५ आइतबार १२:२५:५५ | मुना हमाल

सुर्खेत – राष्ट्रिय गौरवको आयोजनाका रुपमा रहेको भेरी–बबई डाइभर्सन बहुउद्देश्यीय आयोजनाको सुरुङ निर्माण काम सकिएको छ । सुरुङ निर्माण सम्पन्न हुने मितिभन्दा एक वर्ष अगाडि नै सुरुङ खनेर सकिएको हो । सुरुङको औपचारिक ‘ब्रेक थ्रु’ गर्न भने बाँकी छ ।

२०७४ कात्तिक २१ गतेदेखि सुरुङ निर्माणको काम सुरु गरिएको थियो । चाइना ओभरसिज इञ्जिनियरिङ ग्रुप अफ कम्पनिले २०७६ चैत १५ गते भित्र सुरुङ निर्माणको काम सकिसक्ने जिम्मा लिएको थियो । कम्पनिले चीनबाट ल्याइएको टनेल बोरिङ मेसिन (टीबीएम) प्रयोग गरी सुरुङ निर्माणको काम गरेको थियो ।

सुर्खेतको भेरीगंगा नगरपालिका हात्तीखालदेखि चिप्लेसम्म १२ दशमलव २ किलोमिटर मध्ये अब २ मिटर मात्र सुरुङ खन्न बाँकी रहेको छ । सुरुङ निर्माणको काम सुरु गरेको टीबीएम मेसिन वैशाख ३ गते नै चिप्लेमा निकालिने छ ।

सुरुङ निर्माणको ‘ब्रेक थ्रु’ भएको औपचारिक घोषणा प्रधानमन्त्री केपी शर्मा ओलीबाट गर्ने आयोजनाले तयारी गरेको छ । वैशाखको पहिलो सातामा प्रधानमन्त्रीको उपस्थितिमा सुरुङ निर्माण कार्य सम्पन्न भएको औपचारिक घोषणा गरिने आयोजना प्रमुख सञ्जिव बरालले जानकारी दिनुभयो । उहाँका अनुसार वैशाख ३ गते प्रधानमन्त्री ओली सुर्खेत आउने कार्यक्रम रहेको छ ।

‘समय अगावै काम सम्पन्न भएको आयोजना भएकाले उत्साह थपिएको छ । हामीले प्रधानमन्त्रीसँग समय मागेका छौँ । उहाँले वैशाख ३ गतेलाई समय दिनुभएको छ’ आयोजना प्रमुख बरालले भन्नुभयो, ‘अहिले हामी यसैको तयारीमा जुटेका छौँ ।’

सुरुङ निर्माण कार्य सम्पन्न भए पनि भेरीको पानी बबईमा खसाल्न समय लाग्ने छ । आगामी आर्थिक वर्षको सुख्खायामबाट बबईमा पानी खसालिने आयोजना प्रमुख बरालले जानकारी दिनुभयो । भेरीको पानी बबईमा प्रतिसकेण्ड ४० घनमिटर खसालिने आयोजनाले जनाएको छ ।

सुरुङ निर्माणको काम सम्पन्न भएसँगै भेरीगंगा नगरपालिकाको चिप्लेमा बाँध बनाएर भेरीको पानी बबईमा झारेर बबईमा विद्युत गृह निर्माण गर्ने र बर्दिया र बाँकेको जमिनमा सिंचाइँ उपलब्ध गराइने छ । आयोजना सम्पन्न भएपछि बर्दिया ४५ हजार र बाँकेको ६ हजार गरी ५१ हजार हेक्टर जमिनलाई सिंचाइँ उपलब्ध गराउने आयोजनाको लक्ष्य रहेको छ ।

साथै भेरीगंगाको हात्तीखालमा पावर हाउस निर्माण गरेर ४६ दशमलव ८ मेगावट विद्युत उत्पादन गरेर राष्ट्रिय प्रशारण लाइनमा जोडिने छ । अब आयोजनाले विद्युतगृह तथा अन्य संरचनाका लागि प्रक्रिया सुरु गरेको प्रमुख बरालले जानकारी दिनुभयो । यसका लागि खरिद प्रक्रिया अन्तिम चरणमा पुगेको उहाँले जानकारी दिनुभयो ।

झण्डै साढे १० अर्बमा सुरुङ निर्माणको काम सम्पन्न भएको यस आयोजनाको जम्मा लागत ३३ अर्ब १८ करोड रहेको छ । आयोजनाले आर्थिक वर्ष २०७९/८० मा सम्पूर्ण काम गरिसक्ने लक्ष्य लिइएको छ ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

मुना हमाल

मुना हमाल सुर्खेतका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्