प्रदेश १ का २६८ खेलाडी विराटनगरमा सम्मानित

साउन ७, २०७६ मंगलबार १८:३६:३७ | सुमन तिमल्सिना

माेरङ - पाँचौँ महिला साफ च्याम्पियन्सिपका बेला खेलाडीहरुको लागि घोषणा भएका पुरस्कार विराटनगरमा वितरण गरिएकाे छ ।

विराटनगर महानगरपालिकाले २६ जना खेलाडी तथा अफिसियललाई जनही ५० हजार रुपैयाँ नगदसहित सम्मान गरेको हाे । त्यसलगत्तै प्रदेश १ सरकारले मंगलबार घोषणा गरेको जनही नगद एक लाख रुपैयाँसहितकाे खेलाडी सम्मान पनि गरिएकाे छ।

प्रदेश सरकारले विराटनगरमा सम्पन्न भएको महिला साफ च्याम्पियन्सिपका २६ खेलाडीसहित , टिम व्यवस्थापक र प्रशिक्षकलाई एक लाख रुपैयाँसहित सम्मान गर्‍याे । त्यस्तै प्रदेश सरकारले आठौँ राष्ट्रिय खेलकुद प्रतियोगितामा स्वर्ण, रजत र काश्य पदक ल्याउने प्रदेश १ का खेलाडीलाई समेत नगद सहित सम्मान गरेको थियो ।

खेलाडी सम्मान कार्यक्रममा प्रदेश १ सरकारका मुख्यमन्त्री शेरधन राईले प्रदेश १ लाई खेलकुदको राजधानी बनाउने अभिव्यक्ति दिनुभयाे । प्रदेश १ खेलकुदका हिसाबले संभावना बोकेको प्रदेश भएकोले अन्य प्रदेशमा भन्दा प्रदेश १ मा खेलकुदलाई प्राथमिकतामा राखेर अन्य प्रदेशको भन्दा बढी नै रकम विनियोजन भएको दावी पनि गर्नुभयाे ।

प्रदेश १ मा फुटबललाई पहिलो प्राथमिकतामा राखेर मुख्यमन्त्री लिग फुटबल प्रतियोगिता समेत आयोजना भइसकेकोले प्रदेशमा खेलकुदका गतिविधि बढेको उहाँले बताउनुभयाे ।

साफ महिला च्याम्पियनशिप फुटबल प्रतियोगिता इज्जत र प्रतिष्ठासँग जोडिएको विषय भएकोले पनि प्रदेश सरकारले त्यसलाई उच्च महत्व दिएको र प्राथमिकतामा राखेर प्रतियोगिता सफल गराउन हरेक हिसाबमा सहयोग पुर्‍याएको बताउनुभयाे ।

उहाँले पाँचौँ महिला साफ च्याम्पियन्सिपमा नेपाली महिला टोलीको प्रदर्शन उच्च रहेको भन्दै प्रशंसा पनि गर्नुभयाे । मुख्यमन्त्री राईले आगामी प्रतियोगितामा पहिलो स्थानमा आउन अहिलेदेखि नै तयारी सुरु गर्न आग्रह गर्दै भन्नुभयाे, ‘खेलकुदको विकासका लागि जस्तोसुकै सहयोग गर्न व्यक्तिगत र सरकारको तर्फबाट तयार छु ।’

प्रदेशका सबै स्थानीय तहमा खेल मैदान

प्रदेश १ का सामाजिक विकास मन्त्री जीवन घिमिरेले प्रदेश १ का १३७ पालिकामा खेल मैदान निर्माणको काम पूरा भएको बताउनुभएकाे छ । उहाँले प्रदेशका १४ जिल्लामा रंगशाला निर्माणको काम भएको पनि दावी गर्नुभयाे । उनले अहिले निर्माण भईरहेको बिराटनगर महानगरपालिका वडा नम्बर १९को बैजनाथपुर रंगशालालाई अन्तराष्ट्रिय स्तरको बनाउनको लागि काम भईरहेकोले त्यो प्रदेश सरकारको प्राथमिकतामा रहेको जानकारी दिए । धरानलाई खेलकुदको गतिबिधि हुने क्षेत्रको रुपमा विकास गरी धरानलाई खेलकुद ग्राम बनाईने मन्त्री घिमिरेले दाबी गरे ।

अन्तिम अपडेट: कात्तिक २८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सुमन तिमल्सिना

सुमन तिमल्सिना मोरङका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्