बिजुलीमा आत्मनिर्भर हुनै लाग्दा १५ अर्ब रुपैयाँ खर्च गरेर ग्यास पाइपलाइन किन ?

कात्तिक ११, २०७६ सोमबार १६:१५:३४ | उज्यालो सहकर्मी

काठमाण्डौ - नेपाल विद्युत प्राधिकरणले बर्खा याममा नेपाल बिजुलीमा लगभग आत्मनिर्भर भएको दाबी गरेको छ ।

अहिले ११ सय मेगावाटको हाराहारीमा बिजुली उत्पादन भैरहेको छ । चालु आर्थिक वर्षमा अब थप ९ सय मेगावाट बिजुली थपिने प्राधिकरणले जनाएको छ । प्राधिकरणका कार्यकारी निर्देशक कुलमान घिसिङका अनुसार अब बिजुली उत्पादन गर्न भन्दा पनि खपत बढाउन चुनौती छ ।

बिजुली खपत बढाउन विद्युतीय गाडीको प्रयोग बढाउनेदेखि सहुलियतमा विद्युतीय चुल्हो वितरणसम्मका योजना सरकारले बनाइरहेको छ । घर घरमा विद्युतीय चुल्हो पुर्याउन सके बिजुलीको खपत धेरै हुने प्राधिकरणको अनुमान छ ।

तर देश बिजुलीमा आत्मनिर्भर हुँदै गएको बेला नेपाल आयल निगमले भने १५ अर्ब रुपैयाँ खर्च गरेर ग्यास पाइपलाइन बनाउन सर्भे सुरु गरेको छ । भारतको मोतिहारीदेखि चितवनको लोथरसम्मको ९८ किलोमिटर दूरीमा ग्यास पाइपलाइन बनाउन उद्योग वाणिज्य तथा आपूर्ति मन्त्री मातृका यादवले सर्भेको शिलान्यास गर्नुभएको छ । नेपाल आयल निगमका अनुसार यो परियोजनाको प्रारम्भिक खर्च १५ अर्ब रुपैयाँ रहेको छ ।

ग्यास पाइपलाइन निर्माणमा ११ अर्ब १९ करोड रुपैयाँ र भण्डारणस्थल बनाउन ३ अर्ब ८१ करोड रुपैयाँ लाग्ने अनुमान छ । विद्युत प्राधिकरणले विद्युतीय चुल्होले ग्यास विस्थापन गर्ने योजना बनाइरहँदा निगमले १५ अर्ब रुपैयाँ खर्च गरेर किन ग्यास पाइपलाइन बनाउनुपर्याे त ?

निगमका कार्यकारी निर्देशक सुरेन्द्रकुमार पौडेल भन्नुहुन्छ, ‘अहिले ५८ वटा ग्यास उद्योग सञ्चालनमा छन्, थप केहीले पनि अनुमति पाएर स्थापनाको चरणमा छन्, ती उद्योगको संरक्षणसँगै विद्युत प्राधिकरणले दिने बिजुलीको मूल्यलाई पनि हेरेर हामीले ग्यास पाइपलाइन अघि बढाउने तयारी गरेका हौँ ।’

कार्यकारी निर्देशक पौडेलले ग्यास ढुवानीबापत बर्सेनि ४ अर्ब रुपैयाँ खर्च हुने गरेको र पाइपलाइन बनाएमा ४ वर्षमा नै लगानी उठ्ने दाबी गर्नुभयो । ‘१५ सय किलोमिटर परबाट ग्यास आइरहेको छ, त्यसको पैसा कति खर्च भएको होला, प्रदूषण कति भएको होला, अनि झण्झट कति धेरै छ आफै अनुमान गर्नुस्’, पौडेलले भन्नुभयो, ‘१५ अर्ब रुपैयाँले कति मेगावाट बिजुली उत्पादन हुन्छ भनेर बहस हुनु एउटा कुरा हो, तर हामीले पाइपलाइन बनायौँ भने त त्यसको फाइदा भोलिपल्टैबाट हुन्छ नि ।’

‘बिजुली सस्तो हुने भएमा आयोजना नबनाउन पनि सकिन्छ’

आयल निगमका कार्यकारी निर्देशक पौडेलले विद्युतीय सामग्रीको उपयोग बढाउने भन्दै ग्यास पाइपलाइनको विरोध हुनु गलत भएको बताउनुभयो ।

‘विद्युत प्राधिकरणले अहिले कति रुपैयाँमा बिजुली उपलब्ध गराइरहेको छ, सबै घरमा विद्युतीय चुल्हो पुग्नेगरी कहिले बिजुली उत्पादन हुन्छ भन्ने विषयमा बहस हुन जरुरी छ’, पौडेलले भन्नुभयो, ‘हामीले अहिले सर्भेको काम मात्रै सुरु गर्दैछौँ, यदि सबै हिसाबले बिजुली सस्तो हुने भयो र ग्यास विस्थापित नै हुनेरहेछ भने हामी पनि प्रोजेक्ट स्थगित गर्न सक्छौं नि ।’

तर बिजुलीमा आत्मनिर्भर हुँदैछौँ भनेर कुर्दै जाँदा ग्यासको ढुवानी भाडामै अरबौँ रुपैयाँ खर्च गरिरहन भने अब नसकिने पौडेलले बताउनुभयो ।

सम्बन्धित समाचार

भारतबाट अब खाना पकाउने ग्यास पनि पाइपलाइनबाट आउने: निर्माण कार्यकाे शिलान्यास

ग्यास पनि पाइपबाटै पठाउन भारतीय पक्षको जोड, नेपालको प्रशंसा

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्