उपचुनावको हरहिसाब : सबै दलका रणनीति र अनुमान फेल !

मंसिर १६, २०७६ सोमबार १२:५४:१८ | उज्यालो सहकर्मी

उपचुनावको नतिजाले राष्ट्रिय राजनीति र संसदीय समीकरणमा कुनै असर नपर्ने भए पनि सबैजसो दलहरुले यसलाई सुरुदेखि नै प्रतिष्ठाको विषय बनाएका थिए । उनीहरुले यसलाई जनमत परीक्षण गर्ने मौका परीक्षाजस्तो ठानेका थिए ।

यसैअनुसार दलहरुले प्रचारप्रसारलाई भड्किलो बनाए । केन्द्रीय नेताहरु वडाध्यक्षको उम्मेदवारलाई समेत भोट माग्न पुगे । तर प्रतिनिधिसभा, प्रदेशसभा र पालिकाका विभिन्न ५२ स्थानका लागि भएको उपचुनावको नतिजा कुनै पनि दललाई सोचेजस्तो भएन । पहिले पालिकामा एक्लाएक्लै लडेका तत्कालीन एमाले र माओवादी अहिले एक भएर लड्दा पनि त्यसअनुसारको परिणाम आएन ।

याे पनि पढ्नुहाेस्

६० वर्षपछि यसरी ढल्यो धरानमा कम्युनिष्टको विरासत

सरकारले जनभावनाअनुसार काम नगरेकाले उपचुनावको परिणाम आफूअनुकूल हुने प्रमुख प्रतिपक्षी कांग्रेसको अनुमान पनि फेल खायो । मुख्य दुई दल नेकपा र कांग्रेसबीच केही ठाउँमा साटफेर भए पनि समग्रमा परिणाम यसअघिको जस्तै देखिएको छ ।

प्रतिनिधिसभातर्फ उपचुनाव भएको एक मात्र कास्की २ मा नेकपाले जित दोहोर्‍याएकाे छ । यसअघि रवीन्द्र अधिकारीले जितेको यो ठाउँमा यसपटक विद्या भट्टराई निर्वाचित हुनुभएको छ ।

प्रदेशसभाअन्तर्गत भक्तपुर १ (क) मा नेकपाले आफ्नो सिट गुमाएको छ । त्यहाँ कांग्रेसका उम्मेदवार विजयी भएका छन् । प्रदेशसभातर्फ भने दाङमा नेकपाले र बागलुङमा राष्ट्रिय जनमोर्चाले जित दोहोर्‍याएका छन् ।

याे पनि पढ्नुहाेस्

कास्की उपचुनाव : नेकपाकी विद्या भट्टराई विजयी

उपचुनाव भएको एउट मात्रै उपमहानगरपालिकामा कांग्रेस विजयी भएको छ । यसअघि यहाँ एमालेका उम्मेदवार विजयी भएका थिए । यसपटक तत्कालीन एमाले र माओवादी एक भएर बनेको पार्टी कांग्रेससँग पराजित भएको छ । भक्तपुरको प्रदेशसभामा जस्तै धरानको मेयर पदमा पनि नेकपालाई धक्का लागेको छ ।

एक प्रदेशसभा सदस्य र एक उपमहानरपालिकाको मेयर गुमाएको नेकपाले दुई गाउँपालिकाको अध्यक्ष र एक उपाध्यक्षमा भने संख्या थपेको छ । उपचुनाव भएको तीन गाउँपालिकाको अध्यक्षमध्ये संखुवासभाको मकालुमा नेकपाले जित दोहोर्‍याएकाे छ । यसअघि कांग्रेसले जितेको पाँचथरको फाल्गुनन्द र राजपाले जितेको महोत्तरीको पिपरामा पनि नेकपा विजयी भएको छ ।

एउटा गाउँपालिकाको उपाध्यक्षमा पनि नेकपा विजयी भएको छ । यसअघि कांग्रेसले जितेको हुम्लाको खार्पुनाथ गाउँपालिकामा नेकपा विजयी भएको हो । उपचुनाव भएको ४३ वडामध्ये कांग्रेस र नेकपाबीच केही स्थानमा साटफेर भएको छ । यसअघि कांग्रेसले जितेका ७ वडामा नेकपा र यसअघि नेकपाले जितेका ६ वडामा कांग्रेस विजयी भएको छ ।

प्रदेशसभामा जित दोहोर्याउन सफल राष्ट्रिय जनमोर्चाले यसअघि जितेको एउटा वडा चाहिँ गुमाएको छ । समाजवादीले यसअघिको दुईवटा वडा बढाएर चार पुर्याएको छ भने एउटा गाउँपालिका गुमाएको राजपाले दुईवटा वडामा जित दोहोर्याउँदै एउटा वडा थपेको छ ।

समग्रमा नेकपा एक प्रतिनिधिसभा, एक प्रदेशसभा, तीन गाउँपालिका अध्यक्ष, एक उपाध्यक्ष र २४ वडा गरी ३० स्थानमा विजयी भएको छ । यस्तै कांग्रेस एक प्रदेशसभा, एक उपमहानगरपालिका र ११ वडा गरी १३ ठाउँमा विजयी भएको छ । जनमोर्चाले एक प्रदेशसभा, समाजवादीले चार वडा र राजपाले तीन वडा जितेका छन् ।

सम्बन्धित समाचार

भक्तपुर १ (क) मा कांग्रेसका भँडेल विजयी

साझा र विकेकशील पार्टीले चर्चाअनुसार कहीँ पनि उल्लेखनीय मत ल्याउन सकेनन् । पहिलोपटक चुनावमा भाग लिएको सिके राउतको पार्टीको मत पनि नगण्य आयो ।

चुनावी नतिजाले दलहरुलाई आत्मसमीक्षा गर्ने अवसर भने दिएको छ । दुई तिहाईको सरकार हुँदा पनि सोचेजस्तो परिणाम नआएपछि सत्तारुढ नेकपालाई नागरिकको भावनाअनुसार काम गरेर देखाउनुपर्ने चुनौती थपिएको छ ।

सम्बन्धित समाचार

प्रचण्डको गृह जिल्लामा नेकपालाई झट्का, तीनवटै वडामा कांग्रेसको जित

सँगै पार्टी एकीकरणको भावना कार्यकर्तास्तरसम्म पुग्न नसकेको उपचुनावको परिणामले प्रष्ट देखाएको छ । प्रदेश र वडाको नतिजा हेर्दा अझै पनि कार्यकर्तामा एमाले र माओवादीअनुसारको गुटगत स्वार्थले नछोडेको जस्तो देखिन्छ ।

प्रमुख प्रतिपक्षी कांग्रेसलाई पनि सरकारको विरोध गरेर मात्रै जनमत आफ्नो पक्षमा पार्न सकिंदो रहेनछ भन्ने पाठ मिलेको छ ।

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्