निर्भया बलात्कार र हत्यामा संलग्नलाई मृत्युदण्ड फेरि राेकियाे

माघ १८, २०७६ शनिबार ७:३५:१६ | उज्यालो सहकर्मी

काठमाण्डौ – भारतमा निर्भयाको सामूहिक बलात्कार र हत्यामा संलग्नहरुलाई मृत्युदण्ड पुनः रोकिएको छ । गएको माघ ३ गते पटियाला हाउस कोर्टले जारी गरेको वारेन्ट अनुसार चारजना दोषीलाई फेब्रुअरी १ अर्थात माघ १८ गते फाँसी दिइने भनिए पनि फेरि रोकिएको हो ।

जीवनरक्षाको अपिल गरेकामध्ये विनय शर्माको मुद्दा अदालतमा विचाराधिन रहेकाले तोकिएको मितिमा फाँसी नभएको भारतीय सञ्चारमाध्यमले जनाएका छन् । अब पटियाला हाउस कोर्टले डेथ वारेन्टीको आदेश नदिएसम्म उनीहरुको मृत्युदण्ड नहुने खबरमा उल्लेख छ ।

यसअघि जनवरी २२ अर्थात माघ ८ गते नै उनीहरुलाई फाँसी दिनेगरी सजाय सुनाइए पनि फाँसीको दिन फेब्रुअरी १ तारिखका लागि सारिएको थियो । अदालतले बलात्कार घटनाका दोषी ठहर गरेका अक्षय सिंह, विनय शर्मा, पवन गुप्ता र मुकेश सिंहलाई बिहान ६ बजे फाँसी दिने फैसला गरेको थियो ।

अदालतले दोषी ठहर गरेकामध्ये मुकेश सिंहले दिएको जीवनरक्षाको अपील राष्ट्रपति रामनाथ कोविन्दले खारेज गरिदिनुभएको थियो । घटनामा संलग्न मुकेशका दाजु राम सिंहले २०१३ मा तिहाड जेलमा आत्महत्या गरिसकेका छन् ।

राष्ट्रपतिले जीवनरक्षाको अपिल खारेज गरेपछि अदालतका अधिकारीले चार जना दोषीको विरुद्धमा नयाँ ‘डेथ वारेन्ट’ जारी गरेकोे हो । सन् २०१२ को डिसेम्बर १६ मा २३ वर्षकी एक मेडिकल छात्रालाई गुडिरहेको बसमा सामूहिक बलात्कारपछि हत्या गरेको अभियोगमा चारजनालाई मृत्युदण्डको सजाय सुनाइएको हो ।

यस्तो थियो घटना

सन् २०१२ डिसेम्बर १६ तारिखमा रातीको समयमा दिल्लीमा २३ वर्षकी छात्रालाई गुडिरहेको बसमा ६ जनाले सामूहिक बलात्कार गरेका थिए ।

चारजना दोषीबाहेक एक प्रमुख आरोपित राम सिंहले ट्रायको दौरान तिहाज जेलमा आत्महत्या गरेका थिए । घटना हुँदा नाबालिग रहेका एकजना अपराधीलाई सुधारगृह पठाइएको थियो ।

सन् २०१५ मा उनलाई सुधारगृहबाट रिहा गरिएको थियो । उनलाई सन् २०१३ अगष्ट महिनामा सुधारगृहमा तीन वर्ष बिताउने सजाय सुनाइएको थियो ।

उनी अहिले उनी एउटा सहयोगी संस्थामा आबद्ध छन् । बाहिर राख्दा उनलाई असुरक्षा हुने ठानेर उनलाई सँस्थामा राखिएको हो ।

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्