दिल्लीमा फेरि एकपटक आम आदमी पार्टीको सरकार

माघ २९, २०७६ बुधबार ७:४९:२३ | एजेन्सी

काठमाण्डौ – दिल्ली विधानसभा चुनावमा आम आदमी पार्टी (आप) ले फेरि एक पटक उत्कृष्ट प्रदर्शन गर्दै ६२ सिटमा जित हासिल गरेको छ । सन् २०१५ मा तीन सिट जितेको भारतीय जनता पार्टी (भाजपा) ले यसपटक आठ सिट जितेको छ ।

चुनाव आयोगका अनुसार जम्मा ७० सिटमध्ये आप ६२ सिटमा विजयी हुँदा भाजपाले आठ सिटमै चित्त बुझाउनु पर्‍याे । गएको चुनावमा शून्यमा रहेको काङ्ग्रेसले यसपटक पनि खाता खोल्न सकेन ।

मत प्रतिशतको कुरा गर्दा आप ५३ दशमलव ६५ प्रतिशत मतका साथ सबैभन्दा ठूलो पार्टी भएको छ । भाजपा ३८ दशमलव ४२ प्रतिशत मतका साथ दोस्रो स्थानमा छ । सन् २०१५ को विधानसभा चुनावमा नौ प्रतिशतभन्दा धेरै मत प्राप्त गरेको काङ्ग्रेस यसपटक मात्र ४ दशमलव २८ प्रतिशतमा सिमित भएको छ ।

मुख्यमन्त्री अरविन्द केजरीवाल, उपमुख्यमन्त्री मनीष सिसोदियासँगै राघव चड्ढा, आतिशी र दिलीप पान्डे विजयी भएका छन् ।

याे पनि पढ्नुस्

दिल्ली विधानसभा चुनाव : जितपछि केजरीवालले हनुमानलाई दिनुभयो धन्यवाद, मतदातालाई भन्नुभयो- आइ लभ यू

आप सरकारमा मुख्यमन्त्री रहेका सिसोदियाले आफ्नो प्रतिद्वन्द्वी भाजपाका रविन्द्र सिंह नेगीलाई तीन हजारभन्दा धेरै मतले पराजित गरे । सुरुवाती मतगणनामा भने सिसोदिया पछाडि रहेका थिए ।

राजिन्दर नगर विधानसभा क्षेत्रबाट निवर्तमान विधायकको ठाउँमा चुनावी मैदानमा उत्रिएका राघव चड्ढाले पनि भाजपाका आफ्ना प्रतिद्वन्द्वी सरकार आरपी सिंहलाई पराजित गरे ।

आपका एसके बग्गाले कृष्णा नगर सिटमा जित दर्ता गरे जहाँ उनको प्रतिस्पर्धा भाजपाका अनिल गोयसलसँग थियो । त्रिनगर र शालीमार बाग सिटमा पनि अरविन्द केजरीवाल नेतृत्वको आम आदमी पार्टीले जित हासिल गरेको छ ।

आम आदमी पार्टीकी प्रीति तोमर त्रिनगर सिटमा १२ हजार मत प्राप्त गर्दै विजयी भइन् भने शालीमार बाग सिटमा बन्दना कुमारीले आठ सय मतले जित हासिल गरिन् । कोन्डली सिटमा आपका कुलदीप कुमारको प्रतिस्पर्धा भाजपाका राजकुमारसँग थियो, जहाँ कुलदीप विजयी भए ।

सुल्तानपुर माजराबाट आपका मुकेश कुमार अहलावतले भाजपाका रामचन्दर चावडियालाई पराजित गरे ।

आपका मोहिन्दर गोलयले रिठाला सिटमा भाजपाका मनीष चौधरीलाई हराउँदा जङ्गपुरा सिटमा आपका प्रवीण कुमारले भाजपाका इम्प्रीत सिंह बख्शीलाई हराए । आपका राम सिंहले बदरपुर सिटमा भाजपाका रामवीर सिंह बिधूडीलाई हराए ।

यता दिल्ली विधानसभा चुनावमा काङ्ग्रेसले अहिलेसम्मकै खराब प्रदर्शन गरेको छ र कुल मतदानमा पार्टीले पाँच प्रतिशतभन्दा कम मत प्राप्त गरेको छ । काङ्ग्रेसका ६३ जना उम्मेदवारको जमानत जफत गरिएको छ ।

पूर्व मुख्यमन्त्री शीला दीक्षित नेतृत्वको दिल्लीमा १५ वर्षसम्म शासन गर्ने काङ्ग्रेस लगातार दोस्रो पटक विधानसभा चुनावमा एक सिट पनि जित्न सक्षम भएन ।

पार्टीका तीन उम्मेदवार– गान्धी नगरबाट अरविन्दर सिंह लवली, बादलीबाट देवेन्द्र यादव र कस्तूरबा नगरबाट अभिषेक दत्तले मात्र आफ्नो जमानत बचाउन सके ।

दिल्ली काङ्ग्रेसका अध्यक्ष सुभाष चोपडाकी छोरी शिवानी चोपडाको कलकाजी सिटबाट जमानत जफत भयो ।

विधानसभाका पूर्वअध्यक्ष योगानन्द शास्त्रीकी छोरी प्रियङ्का सिंहको पनि जमानत जफत भएको छ ।

काङ्ग्रेस प्रचार समितिका अध्यक्ष कीर्ति आजादकी पत्नी पूनम आजाद पनि सङ्गम विहारबाट आफ्नो जमानत बचाउन सकिनन् । उनले मात्र दुई हजार ६ सय मत अर्थात् २ दशमलव २३ प्रतिशत मत पाइन् ।

मतगणना चलिरहँदा मतगणना केन्द्रमा सुरक्षा व्यवस्था प्रबल बनाइएको थियो । एग्जिट पोलले पनि सत्तारुढ आपको जितको अनुमान गरेको थियो ।

सन् २०१५ को दिल्ली विधानसभा चुनावमा आपले ६७ सिटको साथ प्रचण्ड जित हासिल गरेको थियो र भाजपा मात्र तीन सिटमा सिमित भएको थियो । त्यसबेला दुवै पार्टीको मत प्रतिशत क्रमशः ५४ दशमलव ३ र ३२ दशमलव ३ प्रतिशत थियो ।

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्