फूड बैंक : ‘आवश्यक भए लिएर जानुस्, नत्र दिएर जानुस्’

भदौ १६, २०७७ मंगलबार ९:४१:४५ | जानुका दुवाडी

काठमाण्डाै – कोरोना भाइरस नियन्त्रणका लागि सरकारले लकडाउनको घोषणा गरेपछि देशभरी नै विभिन्न ठाउँहरुमा खाद्यवस्तु वा खाना वितरण गरियो । लकडाउनका कारण समस्यामा परेकाहरुलाई विभिन्न संघ, संस्था तथा मनकारी व्यक्तिहरुले राहत वितरण गरे । सरकारले एक्कासी लकडाउनको घोषणा गरेकाले अलपत्र परेकाहरुलाई लागि त्यसले तत्कालका लागि राम्रै भयो ।

लकडाउनका कारण बाटोमा अलपत्र भएकाहरुको लागि राहत वितरण चलिरहेका बेला धादिङको गजुरी गाउँपालिकाले भने राहतको लागि फरक उपाय थाल्यो । गाउँपालिकाले अप्ठ्यारोमा परेकाहरुलाई सहयोग पुगोस भन्ने उद्देश्यले फूड बैंकको सुरुवात गर्यो । चैत २० गते स्थापना गरेको फुड बैँकले अहिलेसम्म ३२ सय परिवारलाई राहत प्रदान गरिसकेको गजुरी गाउँपालिकाका अध्यक्ष राजेन्द्र विक्रम बस्नेतले जानकारी दिनुभयो ।

फूड बैँकबाट एकजनाका लागि एक पटकमा ५ किलो चामल, १ किलो दाल, तेल, नुन लगायतका सामग्री प्रदान गर्ने गरिएको छ । ५ जनाको परिवार छ भने त्यो परिवारलाई एक पटकमा २५ किलो चामल, त्यही अनुसारको दाल, नुन र तेल वितरण गर्ने गरिएको उहाँले बताउनुभयो ।

फूड बैँकमा अहिले पहिला जस्तो मानिसको भिडभाड हुँदैन । किसानले मकै भित्र्याएकाले हिजोआज पहिलेजस्तो भिडभाड नभएको उहाँले बताउनुभयो । तर अझै पनि कोठामा बस्ने, आर्थिक अवस्था कमजोर भएका, ज्याला मजदुरी गर्नेलाई भने फुड बैँकमार्फत् सहयोग पुगेको छ ।

फूड बैंकमा मानिस आउन कम भए पनि यसलाई निरन्तरता दिने सोच रहेको गाउँपालिका अध्यक्ष बस्नेतले बताउनुभयो । ‘गजुरी गाउँपालिकामा चेपाङ, दलित र तामाङ लगायतको बस्ती छ । तीमध्ये धेरैको आर्थिक अवस्था एकदमै कमजोर छ । उनीहरुलाई मध्यनजर गर्दै फूड बैँक निरन्तरता आवश्यक छ ।’

फूड बैंकमा आफूसँग हुने र अरुलाई सहयोग गर्न चाहनेले दिएर जान्छन भने आवश्यक भएकाहरुले लिएर जाने गर्दछन् । फूड बैँक स्थापना भएपछि विभिन्न दाताहरुले पनि सहयोग गर्दै आइरहेका छन् ।

ठाउँठाउँमा फुड बैंक

धादिङको गजुरी गाउँपालिकाले फूड बैँकको स्थापना गरेपछि पछिल्लो समय देशका अरु ठाउँमा पनि फूड बैँक स्थापना हुन थालेका छन् । दुई हप्ताअघि मात्रै काभ्रेको पनौती नगरपालिकामा फुड बैँकको स्थापना भएको छ । पनौती नगरपालिकाले पनि अति विपन्न परिवार, कोठामा बस्ने तर आर्थिक अवस्था कमजोर भएका, अशक्त लगायतलाई लक्षित गरेर फूड बैँक सञ्चालनमा ल्याएको नगरपालिकाकी उपमेयर गीता बन्जाराले जानकारी दिनुभयो ।

दुई हप्ताको अवधिमा पनि नगरपालिकाले लगभग १२ हजार जनालाई राहत दिइसकेको उहाँले बताउनुभयो । नगरपालिकाले आर्थिक अवस्था हेरेर एक जनालाई १५ दिनदेखि दुई महिनासम्मको लागि पुग्ने गरी चामल, दाल, तेल, नुन, साबुन, सरफ, गेडागुडी लगायतका सामग्री राहत दिने गरेको छ । विभिन्न दाता र नगरपालिकाको सहयोगमा बैँक स्थापना भएको हो ।

उपमेयर बन्जाराका अनुसार कोरोनाको समस्या रहेसम्म फूड बैंकलाई निरन्तरता दिईने छ । त्यपछि निरन्तरता दिने वा नदिने भन्ने विषयमा त्यतिखेरको अवस्थाले निर्धारण गर्ने उहाँले बताउनुभयो ।

गजुरी गाउँपालिका र पनौती नगरपालिका जस्तै पछिल्लो समय देशका विभिन्न ठाउँहरुमा फुड बैँक सञ्चालनमा आएका छन् । फूड बैँकमा चामल, दाल, नुन, तेल, सोयाबिन, आलु, प्याज, तरकारी, मसला , पिठो, आवश्यकता अनुसार हुनेबाट लिइने र नहुनेलाई वितरण गर्ने सञ्चालनकहरुले बताएका छन् ।

पोखरामा १० वर्षीया बालिका प्रिन्सा रेग्मीले पनि भोक उपचार केन्द्र नाम दिएर फूड बैँक सञ्चालनमा ल्याएकी छिन् ।

निरन्तरता दिन आवश्यक

समस्या जसलाई जतिसुकै बेला पर्न सक्छ । यस्ता महामारी र विपत्ति जुनसुकै बेला आउन सक्छ । त्यसैले यस्ता फूड बैँकहरु सञ्चालन गर्न आवश्यक छ । यस्ता उपकारमूलक काम हुन सकेमा कोही व्यक्ति पनि भोकका कारण मर्नुपर्ने अवस्था आउँदैन । कोरोनाको समयमा सञ्चालनमा ल्याइएका कतिपय फूड बैँकहरु फेरि बन्द भएका पनि छन् । त्यसलाई निरन्तरता दिन आवश्यक छ ।

राहत वितरण भन्दा फूड बैँक प्रभावकारी पनि हुन्छ । राहत वितरणमा तामझामसहित फोटो खिच्ने र सामाजिक सञ्जालमा हाल्ने चलन छ । यसले एकातिर कोरोनाको जोखिम बढ्छ भने अर्कोतिर भिडभाड देखेर आवश्यक हुने पनि लिन जाँदैनन् । जानेले पनि हिनताबोध महसुस गर्छन् । तर फूड बैँकमा भने त्यस्तो हुँदैन ।

अझै समाजमा मानवता नहराएको संकेत

पछिल्लो समय फुड बैँक सञ्चालनमा आउनु समाजमा अझै पनि मानवता नहराएको संकेत भएको समाजशास्त्री दिनेश प्रसाईं बताउनुहुन्छ । कतिपय ठाउँमा मानिसहरुले मानवता हरायो, मानिस स्वार्थी भए भन्ने कुरालाई यसले अप्रमाणित गर्ने उहाँ बताउहुुन्छ । समाजमा अझै पनि सकारात्मक सोच भएका मानिस छन् । हरेक विपत्तिमा यो देखिन्छ । जस्तै भूकम्पको बेलामा पनि मानिसहरुले एकले अर्कालाई सहयोग गरेका थिए ।

‘यही समाजमा कालोबजारी गर्ने मानिस पनि छन्, भ्रष्टाचार गर्ने मानिस पनि छन् तर सहयोगी मनको खाँचो पनि छैन भन्ने उदाहरण यसले दिन्छ’ उहाँ बताउनुहुन्छ । कोरोना सङ्क्रमितलाई घृणा गर्ने मानिस पनि यही समाजमा भएका र सहयोग र सद्भाव राख्ने मानिस पनि यही समाजमा भएका उहँले बताउनुभयो ।

अबका दिनमा फूड बैँकलाई निरन्तरता दिनुपर्ने उहाँको भनाई छ । ‘अहिले मानिसको रोजगारी गुमेको छ । आर्थिक अवस्था कमजोर भएको छ । दीर्घकालीन रुपमा अगाडि बढाउन सकेमा त धेरै राम्रो हो । त्यति नसके पनि तत्कालको लागि फूड बैँक स्थापना हुन पनि धेरै राम्रो हो’ समाजशास्त्री प्रसाईंले भन्नुभयो ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

जानुका दुवाडी

जानुका दुवाडी उज्यालाेमा कार्यरत हुनुहुन्छ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्