भनभन भाइ हो – के भन्ने ! ओलीलाई राजीनामा – दे भन्ने !!

कात्तिक २९, २०७७ शनिबार ९:३६:२९ | मिलन तिमिल्सिना

काठमाण्डाै - सरकारले यस वर्ष नागरिकलाई देउसीभैलो नखेल्नु भनेको छ । तर सरकारका मान्छे र नेताहरु चाहिँ तिहार सुरु हुनु छ महिना अघिदेखि नै देउसीभैलो खेल्दैछन् ।

नेकपामा प्रचण्डसहितका ठूला पाँच भाइ धेरैजसो खुमलटारमा देउसी भट्याउने गीत बनाउँछन्, र खुमलटारमा बनाएको गीत बालुवाटार पुगेर देउसी र भैलीको भाकामा भट्याउँछन् ।

आहै केराको थम्मा - देउसिरे
पाँचभाइ जम्मा - देउसिरे
आहै भनभन भाइ हो - के भन्ने ?
ओलीलाई राजीनामा - दे भन्ने
हामीलाई कुर्सी - ले भन्ने
बातचित र बैठक - खै भन्ने
अरुभन्दा जान्ने - मै भन्ने

आहै हामी यसै आएनौं - बालुवाटारको याद आयो ।
पद र पावर नहुँदा - बाडुली लाग्यो बालुवाटारको
कुर्सी र गाडी कम हुँदा - रजगजको दिन याद आयो
कति बस्छौ ओली - बालुवाटार
हामीलाई छाड्देउ - बालुवाटार
मागमाग भाइ हो - राजीनामा
गन्ती गर दिनको - राजीनामा
आ है घोडा बान्ने तबेला - देउसिरे
राजीनामा किन अबेला - देउसिरे !

बेला न कुबेला राजीनामा किन अबेला भन्दै देउसी खेल्ने पाँच भाइलाई बाल दिनुको सट्टा ओली आफ्नै जुँगा र बाल ऐनामा हेरेर मख्ख पर्छन् । पाँच भाइ देउसी भट्याउँदैछन्, उनी जुँगा कालो भयो भनेर दंग पर्दैछन् । देउसी खेल्न ओली पनि के कम ? देउसी खेल्ने दौंतरीले साथ छोड्दै गएपछि उनी भाषण र उद्घाटनमा पुगेर देउसी खेल्छन् ।
आहै म त्यसै आइन - बालुवाटार
राजा खेद्ने जनताले पठाए - बालुवाटार
मैले किन छाड्ने - बालुवाटार
छोड्दै छोड्दिनँ - बालुवाटार
आहै दिंदै दिन्न - राजीनामा
सुन्दै सुन्दिनँ - राजीनामा
ए छानामाथि घिरौंला - देउसिरे
कसरी हटाउँछन् हेरौँला - देउसिरे
कुर्सी हल्ले नि - बाल छैन
पाँच भाइले खेदे नि - बाल छैन
नागरिकले दुःख पाउन् - बाल छैन
समृद्धिले हावा खाओस् - बाल छैन
आहै घोडा बान्ने तबेला - देउसिरे
राजीनामा दिने होइन बेला - देउसिरे !

सत्ताको डाडु पन्यौ लिएर बसेका नेकपाका एकथरीलाई बालुवाटार छिर्न नपाएर अबेला भएको छ । अर्कोथरीलाई बालुवाटार छोड्ने बेला भएको छैन । बेला भएन र अबेला भयो भनेर उनीहरु देउसिरे खेल्दैछन् । नागरिक चाहिँ कोरोनाको डर र महंगीको मारले आफ्नो देउसी कस्का अगाडि भट्याउने भनेर जिल्लाराम छन् ।
आहै यतै फर्के - कोरोना
उतै फर्के - कोरोना
उठीबास भइयो - कोरोना
बिल्लीबाठ भइयो - कोरोना
करभन्दा चर्को - कोरोना
डर छैन अर्को - कोरोना
सोझासिधा रुवाउने - कोरोना
टाठाबाठा हँसाउने - कोरोना
ढाँट्ने छल्ने निहुँ भो -कोरोना
भ्रष्टाचारको बीउ भो - कोरोना
बिदा चाहियो - कोरोना
सिदा चाहियो - कोरोना
काम खोस्ने बहाना - कोरोना
माम खोस्ने मेसो - कोरोना
खाम भर्ने पनि - कोरोना
हाम पार्ने पनि - कोरोना
ठूलालाई चैन हो - कोरोना
सानालाई ऐन हो - कोरोना
कहिले जाला भागी - कोरोना !

टाठाबाठाले कोरोनाको कारण मौकामा चौका हान्न पाइयोस् भन्दै देउसिरे भट्याइरहे पनि सोधासिधा नागरिक चाहिँ कोरोना भागीजाओस् भनेर देउसीभैलोमै कामना गर्दैछन् । सत्ता चलाउने नेता र सताइरहने कोरोनाबाट आजित उनीहरुले देउसीमा आशीष पनि मिसाएका छन् :
जेटको जस्तो - हाल नहोस्
पाइलटको जस्तो - चाल नहोस्
जनकपुरमा - रेल चलोस्
टनकपुरमा - झेल नहोस्
कोरोना सोरोना - हटी जा
लकडाउन र कर्फ्यु - मेटी जा
महँगीले आकाश - नछोओस्
जागिर र नोकरी - नगुमोस्
सरकारको आङमा - घाम लागोस्
घामपार्टीको नाकमा - डाम नलागोस्
नागरिकले सुन्ने - भाषण होओस्
भाषणभन्दा धेरै - रासन होओस्
चुच्चे नक्सा - बुच्चे नहोस्
भारतको अघिल्तिर - फुच्चे नहोस् ।

अन्तिम अपडेट: मंसिर २३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

मिलन तिमिल्सिना

दुई दशकदेखि रेडियो र अनलाइन पत्रकारितामा संलग्न मिलन तिमिल्सिना समसामयिक विषयमा विश्लेषण र व्यंग्यमा दखल राख्नुहुन्छ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्