‘सरकारले अविश्वास प्रस्तावकाे डटेर सामना गर्छ, आउने परिणाम स्वीकार्छ’

फागुन १४, २०७७ शुक्रबार १९:४१:३१ | उज्यालो सहकर्मी

काठमाण्डाै – उपप्रधानमन्त्री तथा नेपाल कम्युनिस्ट पार्टी (नेकपा) केपी शर्मा ओली समूहका सचिवालय सदस्य ईश्वर पोखरेलले सरकारविरुद्ध अविश्वासको प्रस्ताव ल्याउन चुनौती दिनुभएको छ ।

शुक्रबार नेकपा ओली पक्षीय अखिल नेपाल स्वतन्त्र विद्यार्थी युनियनले आयाेजना गरेकाे कार्यकर्ता भेलालाई सम्बोधन गर्दै उपप्रधानमन्त्री पोखरेलले सरकारका विरुद्ध अविश्वासको प्रस्ताव ल्याउन नेपाल कम्युनिस्ट पार्टी (नेकपा) काे प्रचण्ड–माधव समूहलाई चुनौती दिनुभएको हो । केपी शर्मा ओली नेतृत्वको सरकारले लोकतान्त्रिक विधिबाट आउने अविश्वासको प्रस्तावको डटेर सामना गर्ने बताउनुभयो ।

अविश्वासको प्रस्तावको सामना गर्दा आउने परिणामलाई स्वीकार गर्ने पनि बताउनुभयो । उहाँले भन्नुभयो, ‘केपी ओली संसद्को सर्वोच्चतालाई मान्छन् । केपी ओली संसद्को सर्वोच्चतालाई मानेर त्यहाँ सामना गर्छन् । तिम्रो हिम्मत छ भने अविश्वासको प्रस्ताव ल्याऊ, त्यो अविश्वासको प्रस्तावको सामना गर्छन् केपी ओलीले । केपी ओलीको नेतृत्वमा रहेको नेकपाले ती सबै लोकतान्त्रिक विधिबाट आउने कुराको सामना गर्छन्, तिमी सबैले बुझ । म यहाँहरूलाई के भन्न चाहन्छु भने हामी त्यो कार्यान्वयन गर्छाैँ भनेको अर्थ के हो भने संसद् बोलाउने कुराको हामी प्रक्रियामा अगाडि बढ्छौँ, संसद्को सामना गर्छौँ । कसको हिम्मत छ ? अविश्वासको प्रस्ताव ल्याऊ, त्यसको डटेर हामी सामना गर्छौँ । त्यो अविश्वासको प्रस्तावको सामना गर्दा जे परिणाम हुन्छ, त्यसलाई स्वीकार गर्छौँ । यो सबैले बुझे हुन्छ ।’

उपप्रधानमन्त्री पोखरेलले केपी शर्मा ओलीले पदबाट राजीनामा नदिने पनि स्पष्ट पार्नुभयो । संसदमा अविश्वासको प्रस्तावको सामना गरेर लोकतन्त्रप्रतिको प्रतिबद्धतालाई ओलीले फेरि एक पटक प्रमाणित गर्ने उहाँको दाबी छ । सडकमा नारा लगाउँदैमा प्रधानमन्त्री ओली आफ्नो जिम्मेवारीबाट नपन्छिने नेता पाेखरेलकाे दाबी छ ।

उहाँले भन्नुभयो, ‘केपी ओलीले बीचमै छोड्छन् कि, यस खालका कुराहरू तपाईँहरूलाई लागेको हुन सक्छ । म केपी ओलीको सरकारको टिमको एउटा जिम्मेवार मन्त्री भएको नाताले म तपाईँहरूलाई पूर्णजवाफदेहिताका साथ भन्न चाहान्छु । केपी ओली लोकतन्त्रमा विश्वास गर्ने, संस्थागत ढङ्गले, लोकतान्त्रिक ढङ्गले गरिएका अभ्यासहरूमा विश्वास गर्ने व्यक्ति भएको हुनाले संसद्को सामना गर्नुहुन्छ । संसद्को सामना गरेर नेपाली नागरिकसमक्ष आफ्नो लोकतन्त्रप्रतिको प्रतिबद्धतालाई फेरि एक पटक प्रमाणित गर्नुहुन्छ । तर सडकमा नारा लगाउँदैमा केपी ओलीले आफ्नो जिम्मेवारीबाट कहिल्यै पनि पन्छिनु हुने छैन । यो म तपाईँहरूलाई विश्वास दिलाउन चाहन्छु ।’

उपप्रधानमन्त्री पोखरेलले सबैभन्दा ठूलो फैसला दिने न्यायाधीशहरू नागरिक भएकाले आफूहरू नागरिकले गर्ने फैसलाको प्रतीक्षामा रहेको बताउनुभयो । सर्वोच्च अदालतको फैसलाले देशलाई दुर्भाग्यतिर जान प्रेरित गरेको, राजनीतिक अस्थिरता निम्त्याउने, आर्थिक समृद्धिमा बाधा पुर्‍याउने, अराजकतालाई बढावा दिने तथा देशको राष्ट्रियता र स्वाभिमानको पक्षलाई कमजोर बनाउने बताउनुभयो ।

त्यसैगरी, कार्यक्रममा बोल्दै ऊर्जा, जलस्रोत तथा सिँचाइ मन्त्री टोपबहादुर रायमाझीले आफ्नो पार्टी चुनाव अथवा सदनमा भिड्न तयार रहेको बताउनुभयो । उहाँले भन्नुभयो, ‘हामीलाई संसद् पुनर्स्थापना होस् या निर्वाचन होस्, हाम्रो टिम केपी शर्मा ओलीले नेतृत्व गरेको पार्टी र संस्था चुनाव भिड्न होस् या सदनमा भिड्न होस् हर क्षेत्रमा तयार छ । हर मोर्चामा लड्न तयार छ । हामी थाकेका छैनौँ । हामी आत्तिएका छैनौँ । हामी मात्तिएका छैनौँ ।’

मन्त्री रायमाझीले फेरि मध्यावधि चुनावमा जाने सम्भावना रहेको पनि दाबी गर्नुभयो ।

अन्तिम अपडेट: माघ ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

1 Comments

Bamdev Subedi
Feb. 26, 2021, 8:50 p.m.
"लोकतन्त्रप्रतिको प्रतिबद्धतालाई ओलीले फेरि एक पटक प्रमाणित गर्ने उहाँको दाबी छ ।" किन बार बार लोकतन्त्रप्रतिको प्रतिबद्धता प्रमाणित गर्नु पर्यो ? अदालतले उहाको प्रतिबध्दता प्रमाणित गरि सक्यो त ! "केपी ओली लोकतन्त्रमा विश्वास गर्ने व्यक्ति भएको सबैले थाहा पाई सके, भनि रहनु परेन । पार्टी भित्र लोकतान्त्रिक ब्यबहार प्रस्तुत गरि सकेको हुदा अब सन्देह रहेन I ओलीको निर्णयले होइन बरु "सर्वोच्च अदालतको फैसलाले देशलाई दुर्भाग्यतिर जान प्रेरित गर्ने, राजनीतिक अस्थिरता निम्त्याउने" कुरा पनि विश्वास गर्न लाएक छ, अनि "हामी थाकेका छैनौँ । हामी आत्तिएका छैनौँ । हामी मात्तिएका छैनौँ ।" भनि रहदा पक्कै हो कि जस्तो लाग्छ I
0 Reply

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

‘सरकारले अविश्वास प्रस्तावकाे डटेर सामना गर्छ, आउने परिणाम स्वीकार्छ’

1 Comments

Bamdev Subedi

तपाईको प्रतिक्रिया

तपाईको प्रतिक्रिया