दिपायल विमानस्थल स्तरोन्नतिका लागि प्राविधिक टोलीद्वारा अध्ययन सुरु

माघ १, २०७८ शनिबार १९:४२:७ | विमल बिष्ट

डोटी – सुदूरपश्चिम प्रदेशका पहाडी जिल्लाको सबैभन्दा पुरानो दिपायल विमानस्थलको स्तरोन्नोति हुने भएको छ ।

संस्कृति, पर्यटन तथा नागरिक उड्डयनमन्त्री प्रेमबहादुर आलेले विमानस्थलको स्तराेन्नतिका लागि १८ करोड रुपैयाँ बजेट विनियोजन गर्नुभएसँगै विमानस्थल स्तराेन्नतिको लागि अध्ययन गर्न टोली दिपायल आइपुगेको हो ।

नेपाल नागरिक उड्डयन प्राधिकरणको प्राविधिक टोलीले विमानस्थल वरपरको जग्गा अधिग्रहण गर्नुपर्ने जमिनको अवलोकन गरेको दिपायल विमानस्थलले जनाएको छ । नागरिक उड्डयन प्राधिकरणका प्रबन्धक रत्नबहादुर श्रेष्ठको नेतृत्वमा आएको टोलीले दिपायल विमानस्थलको स्तराेन्नतिका लागि अध्ययन गरिरहेको बताइएको छ ।

टोलीले यहाँका जनप्रतिनिधि, समाजसेवी, नागरिक समाज, सञ्चारकर्मीसँग विमानस्थलको स्तराेन्नतिका विषयमा राय सुझाव मागेको दिपायलका स्थानीयवासी भरत द्धारीयाले बताउनुभयो ।

उहाँले भन्नुभयो, ‘मन्त्रीज्यूले बजेट विनियोजन गर्नुभएसँगै विमानस्थल विस्तारका लागि अध्ययन टोली आएको छ, राय सुझाव मागेको छ, अब त ठूलो जहाज चल्छ कि खुशी लागेको छ ।’ विमानस्थल स्तराेन्नति तथा जग्गा अधिग्रहणसहित १८ करोड रुपैयाँ बजेट विनियोजन भएसँगै यो विमानस्थलमा ठूलो जहाज चल्नेमा यहाँका नागरिकहरु निकै खुशी भएका छन् ।

अनुगमनका लागि आउनु भएका नागरिक उड्डयन प्राधिकरणका प्रबन्धक श्रेष्ठले दिपायल विमानस्थललाई थ्री सी वर्गको विमानस्थलका रुपमा स्तराेन्नति गर्ने योजना रहेको बताउनुभयो । उहाँले भन्नुभयो, ‘थ्री सी वर्गको विमानस्थलका रुपमा स्तराेन्नति गर्ने योजना अनुसार काम अगाडि बढाउने योजना छ, याे काम सम्पन्न भए दिपायलमा ७२ सिटे जहाज उडाउन सकिनेछ ।’

अहिले दिपायल विमानस्थलको धावनमार्ग (रन–वे) जम्मा ४५० मिटर मात्र रहेकोमा स्तराेन्नतिका लागि एक हजार २०० मिटर लम्बाइ चाहिने अध्ययन अनुगमनमा आएको प्राविधिक टोलीले जनाएको छ । धावनमार्गको दुवैतर्फ गरी १५० मिटर चौडाइ आवश्यक पर्ने टोली सदस्य नलविक्रम थापाले जानकारी दिनुभयो । धावनमार्गको अहिलेको चौडाइ जम्मा ६५ मिटर मात्र भइरहेको बताइएको छ ।

अहिले विमानस्थल रहेको बायाँतर्फको एयरपोर्ट बजार पूरै विस्थापित हुने तथा दक्षिणतर्फ घटाल मन्दिरको छेउ र उत्तरतर्फ वडा नं २ को कार्यालयको खोलासम्म अधिग्रहण गर्नुपर्ने प्रारम्भिक चरणमा देखिएको प्राविधिक टोलीले जानकारी दिएको छ ।

विमानस्थल स्तराेन्नतिका लागि आवश्यक पर्ने जमिन अधिग्रहणका लागि यहाँका नागरिकहरुले पनि सहमति दिएको दिपायल सिलगढी नगरपालिका–२ का वडाअध्यक्ष राजेन्द्र खड्काले बताउनुभयो । उहाँले भन्नुभयो, ‘विमानस्थल स्तराेन्नतिका लागि यहाँका स्थानीयवासी पनि सहमत भएका छन्, स्तराेन्नतिको काम चाँडो गर्नुपर्छ ।'

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

विमल बिष्ट

विमल बिष्ट डोटीका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्