वैदेशिक रोजगारीका समस्या समाधानमा निष्पक्ष भएर काम गर्न निर्देशन

जेठ ३०, २०७५ बुधबार १२:१३:३४

बिजय भुसाल

नुवाकोट – नुवाकोटका प्रहरी उपरीक्षक बसन्तबहादुर कुँवरले वैदेशिक रोजगारमा समस्या समाधानमा निष्पक्ष भएर काम गर्न मातहतका निकायलाई निर्देशन दिनुभएको छ ।

बिदुरमा गरिएको सुरक्षित वैदेशिक रोजगार व्यवस्थापन र पीडितलाई न्यायका लागि स्थानीयस्तरमा कार्यरत प्रहरीको भूमिका विषयक कार्यक्रममा प्रहरी उपरिक्षक कुँवरले वैदेशिक रोजगारीका क्रममा ठगिएमा प्रहरीले गर्न सक्ने कारवाही बारे जानकारी गराउँदै यस्तो निर्देशन दिनुभएको हो ।

जिल्ला समन्वय समितिद्वारा सञ्चालित सुरक्षित आप्रवासन परियोजना सामीले गरेको कार्यक्रममा उहाँले जिल्लामा पछिल्लो समयमा वैदेशिक रोजगारीका कारण समस्यामा पर्नेहरुमा पुरुष बढी रहेको पनि बताउनुभयो ।

कार्यक्रमको अध्यक्षता गरेका जिल्ला समन्वय समितिका अध्यक्ष सन्तमान तामाङले वैदेशिक रोजगार देशको अर्थतन्त्रको अभिन्न अङ्ग भएपनि यसबाट उत्पन्न समस्या पनि ठूलो रहेको बताउनुभयो ।

रहरले गर्दा विदेशिनेहरु बढेको भन्दै उहाँले त्यसले पारिवारिक समस्या उत्पन्न भएको, नेपालको श्रम शक्ति विदेश पलाएन भएको, जग्गा बाँझै हुन थालेको र आफैंले फलाउन सक्ने खाद्यान्न पनि किनेर खाने बानी बढेको भन्दै यसलाई घटाउन सचेत हुनुपर्ने बताउनुभयो ।

प्रसासकीय अधिकृत नन्दलाल शर्माले नुवाकोटमा उमेर बढाएर नागरिकता, पासपोर्ट बनाउने समस्या रहेको भन्दै त्यही कारण समस्यामा पर्ने भएकाले यसलाई न्युनिकरण गर्नुपर्नेमा जोड दिनुभयो । एक सय ५० जना प्रहरी जवान सहभागी कार्यक्रमको सञ्चालन सामीका कार्यक्रम संयोजक निरु सूचिकारले गर्नुभएको थियो।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

(अनिवार्य)