१० महिनामा सरकारको आम्दानी ८ खर्ब ४९ अर्ब, खर्च भने १० खर्ब रुपैयाँभन्दा धेरै

जेठ १, २०८१ मंगलबार १५:१:१० | उज्यालो सहकर्मी

काठमाण्डाै – चालु आर्थिक वर्षको १० महिनामा सरकारको आम्दानीभन्दा खर्च दुई खर्ब रुपैयाँभन्दा धेरै पुगेको छ । आम्दानी कम र खर्च धेरै हुँदा सरकारी खाता दुई खर्ब तीन अर्ब रुपैयाँभन्दा धेरै घाटामा रहेको हो ।

महालेखा नियन्त्रकको कार्यालयका अनुसार साउनदेखि वैशाखसम्मको १० महिनामा राजस्व र अनुदान गरेर आठ खर्ब ४९ अर्ब १४ करोड रुपैयाँ आम्दानी भएको छ । तर खर्च भने १० खर्ब ५२ अर्ब १४ करोड रुपैयाँ रहेको छ । चालु आर्थिक वर्षमा सरकारले १४ खर्ब २२ अर्ब रुपैयाँ राजस्व उठाउने लक्ष्य राखेकोमा १० महिनामा जम्मा आठ खर्ब २४ अर्ब अर्थात् ५८ दशमलव ४८ प्रतिशत मात्रै सङ्कलन भएको छ ।

यस्तै ४९ अर्ब ९४ करोड रुपैयाँ अनुदानको लक्ष्य राखेकोमा दुई अर्ब २५ करोड अर्थात् लक्ष्यको साढे पाँच प्रतिशत मात्रै प्राप्त भएको छ । यसैगरी १७ खर्ब ५१ अर्ब ३१ करोड रुपैयाँको बजेटमध्ये हिजोससम्म १० खर्ब ५२ अर्ब १४ करोड रुपैयाँ खर्च भएको छ ।

चालुतर्फ ११ खर्ब ४१ करोड ७८ लाख रुपैयाँ खर्च गर्ने लक्ष्य रहेकोमा १० महिनामा सात खर्ब ४९ अर्ब रुपैयाँ खर्च भएको छ । तीन खर्ब दुई अर्ब रुपैयाँ पुँजीगत अर्थात् विकास खर्चको लक्ष्य रहेकोमा १० महिनामा जम्मा एक खर्ब नौ अर्ब ९६ करोड रुपैयाँ अर्थात् जम्मा ३७ दशमलव शून्य चार प्रतिशत मात्रै खर्च भएको छ ।

१० महिनामा जम्मा ३७ प्रतिशत मात्रै पुँजीगत खर्च हुनुले देशमा भौतिक विकास कति सुस्त छ भन्ने देखाएको छ । यस्तै वित्तीय व्यवस्था अर्थात् ऋण तिर्न र शेयरमा लगानीतर्फ तीन खर्ब सात अर्ब रुपैयाँ खर्चको लक्ष्य रहेकोमा एक खर्ब ९२ अर्ब ४५ करोड रुपैयाँ अर्थात् ६२ दशमलव ६ प्रतिशत खर्च भएको छ ।

अन्तिम अपडेट: मंसिर ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्