‘प्रधानमन्त्रीज्यू, कारबाही गर्दै जाने हाे भने त तपाईँ पनि बाँकी रहनु हुन्न नि !’

चैत ४, २०७७ बुधबार १४:४०:५३ | उज्यालो सहकर्मी

ललितपुर – नेपाल कम्युनिस्ट पार्टी एमालेकाे नेपाल समूहले काठमाण्डौमा जारी राष्ट्रिय कार्यकर्ता भेलाबाट आउँदाे तीन महिनाको कार्यभार बनाउने भएको छ ।

ललितपुरको एक होटलमा भइरहेकाे बृहत् राष्ट्रिय कार्यकर्ता भेलाले वर्तमान राजनीतिक अवस्थामा पार्टीलाई एकताबद्ध गर्दे स्वेच्छारी शक्तिको विरुद्ध लड्ने रणनीति तय गर्न लागेको जनाइएकाे छ । बुधवार सुरु भेलामा पहिलो दिन सहभागीलाई विभिन्न १० वटा समूहमा विभाजन गरेर समूहगत छलफल गरिने छ । १० वटै समूहमा उठेका सुझावलाई एकीकृत गरी बिहीवारकाे बैठकमा प्रस्तुत गर्ने कार्यतालिका रहेको छ ।

बैठकले प्राप्त सुझावका आधारमा आउँदाे तीन महिनाका लागि कार्यभार बनाउने र त्यसलाई सभाले पारित गर्ने नेता गङ्गालाल तुलाधरले जानकारी दिनुभयो । मूलभूत रूपमा वर्तमान परिवेशमा पार्टी एकता कायम गरी नेतृत्वको स्वेच्छाचारी कदम विरुद्धका अन्तरसङ्घर्षहरूलाई रणनैतिक रूपमा कार्यभारमा समावेश गरिने पनि उहाँले बताउनुभयो । सर्वोच्च अदालतको फैसलापछि नेकपा एमालेलाई फेरि सक्रियताका साथ अगाडि बढाउने जिम्मेवारी काँधमा आएका बेला पार्टी अध्यक्ष केपी शर्मा ओलीकाे क्रियाकलापले पार्टी एकता भाँडिने सङ्केत देखिएकाले आफूहरू कार्यकर्ता भेला गरी उनीहरूको सुझावका आधारमा पार्टी एकताको पक्षमा अघि बढ्ने निष्कर्षमा पुगेको उहाँकाे भनाइ छ ।

उहाँले भन्नुभयो, ‘एकपक्षीय ढङ्गले स्वेच्छाचारी, दम्भ र घमण्डी स्वभावलाई देखाउँदै पार्टी अध्यक्ष केपी ओलीले जुन प्रकारका हर्कतहरू देखाउन थाल्नुभयो, त्यसले पार्टी एकता भाँडिने सङ्केत देख्यौँ । पछिल्लो शृङ्खला भनेको २८ गते केन्द्रीय पदाधिकारीको जिम्मेवारी खोस्ने, एकपक्षीय रूपबाट पदाधिकारी सदस्य थपेको घोषणा गर्ने र कैयौँलाई पार्टी जिम्मेवारीबाट हटाउने र कारबाही गर्ने भन्ने स्थिति आएपछि हामी पार्टी जोगाउने हो भने स्वेच्छाचारी कदमको विरोधमा उत्रनु पर्दछ भन्ने निष्कर्षमा पुग्यौँ । यो पार्टीलाई एकताबद्ध गरेर लैजाने हो भने हैकमवादी प्रवृत्तिबाट पार्टीलाई जोगाउनुपर्छ । त्यस्तो खालको कुरा महसुस भइसकेपछि हामी यो ठाउँमा आइपुगेका हौँ ।’

उहाँले एकताका साथ अघि बढ्नका लागि भेलाले ऊर्जा दिने विश्वास आफूहरूले लिएको बताउनुभयो । उहाँले भेलामा भएको कार्यकर्ताको उपस्थितिले पार्टी अध्यक्ष ओलीको काम कारबाहीहरू कुनै पनि हालतमा सर्वस्वीकार्य छैन र विरोधयोग्य छ भन्ने सन्देश पनि देशव्यापी रूपमा प्रवाहित गरेको दाबी गर्नुभयो । पार्टी अध्यक्षले गुटगत भेलामा सहभागी भए कारबाही गर्ने बताइरहेका बेला पार्टी एकताका लागि जुनसुकै परिणाम भोग्ने मानसिकतामा नेता तथा कार्यकर्ता भेलामा सहभागी भएको पनि उहाँले बताउनुभयो ।

उहाँले भन्नुभयो, ‘उहाँले कति कारबाही गरेर जानुहुन्छ, त्यो पनि हामी हेर्नेवाला छौँ । हामी उहाँलाई भन्न चाहन्छौँ– तपाईँ कारबाही गरेर देखाउनुहोस् । आजदेखि हामी कारबाहीका लागि लामबद्ध हुँदैछौँ, २५ सय कार्यकर्ताहरू यहाँ लामबद्ध भएर । केपी ओली कमरेडलाई हामी भन्न चाहन्छौँ– तपाईँ कारबाही गरेर देखाउनुहोस् । कारबाही गर्दै जाने हो भने त उहाँ पनि बाँकी रहनु हुन्न नि त । उहाँ भोलि गएर ऐया पनि भन्न नसक्ने अवस्थामा पुग्नु हुन्छ ।’

उहाँले बृहत्तर वामपन्थी एकताबाट च्युत हुनु हुँदैन भन्ने मानसिकताले आफूहरू अगाडि बढ्दै गरेको अवस्थामा अध्यक्ष ओलीबाट एमाले पनि एकताबद्ध भएर अघि बढ्न नसक्ने परिस्थिति सिर्जना हुनु दुःखद भएको प्रतिक्रिया दिनुभयो । विभाजित हुन नपरोस् भन्ने मनोविज्ञान कार्यकर्तामा देखिएको भए पनि नेतृत्वले विभेदपूर्ण व्यवहार गरेकाले समस्या भएको भन्दै नेता तुलाधरले कुनै पनि कार्यकर्ता नेतृत्ववाट अपमानित भएर बस्न नसक्ने बताउनुभयो ।

अन्तिम अपडेट: पुस २५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्