आईएमई र जीएमई मर्जरपछिको एकीकृत कारोबार शुभारम्भ

साउन ३१, २०८१ बिहीबार ९:२४:२९ | उज्यालो सहकर्मी

काठमाण्डाै – आईएमई र जीएमई रेमिटले मर्जरपछिको एकीकृत कारोबार शुभारम्भ भएको छ । नेपाल राष्ट्र बैंकका डेपुटी गभर्नर बमबहादुर मिश्र, आईएमई लिमिटेडका अध्यक्ष चन्द्रप्रसाद ढकाल, आईएमई लिमिटेडका प्रबन्ध निर्देशक हेमराज ढकाल र नेपाल राष्ट्र बैंकका कार्यकारी निर्देशक गुरुप्रसाद पौडेलले हिजाे आयाेजित एक कार्यक्रममा एकीकृत कारोबारको संयुक्त रूपमा शुभारम्भ गरेका हुन् ।

मर्जरपछि बनेको आईएमईको चुक्ता पूँजी एक अर्ब रुपैयाँ नाघेको छ । एकीकृत कारोबारको शुभारम्भ गर्दै डेपुटी गभर्नर मिश्रले राष्ट्र बैंकको प्राथमिकता बमोजिम औपचारिक अर्थतन्त्र निर्माणमा आईएमई रेमिट्यान्सको योगदान सशक्त रहेको बताउनुभयाे । रेमिट्यान्स सेवालाई सहज एवम् थप प्रविधियुक्त र सुलभ बनाउन पनि मर्जरले योगदान दिने उहाँकाे भनाइ छ ।

यस्तै आईइएमईका अध्यक्ष चन्द्रप्रसाद ढकालले झन्डै २५ वर्ष पहिले कम्पनी स्थापनाको समयलाई स्मरण गर्नुभयाे । अध्यक्ष ढकालले भन्नुभयाे, ‘सन् २००१ अर्थात् आजभन्दा झन्डै २५ वर्ष पहिले, मनी एक्सचेन्जको सानो काउन्टरबाट शुरू भएको आईएमई अर्थात् इन्टरनेशनल मनी एक्सप्रेसको यात्रा त्यो समय पक्कै पनि सहज थिएन । सहज त के निजी क्षेत्रले पनि यसरी औपचारिक रूपमा विदेशबाट रकम भित्र्याउने कुराको कल्पना नै थिएन । नेपाल सरकारले वैदेशिक रोजगारीका लागि केही देशहरू खुला गरिसकेपछि वैदेशिक रोजगारीमा जाने नेपालीहरूको सङ्ख्या भर्खरै बढ्न शुरू गरेको थियो । जापान बस्दा हामी आफैँले नेपालमा पैसा पठाउँदा खेपेको सकस, अनौपचारिक र असुरक्षित माध्यमका कारण धेरै नेपालीहरूले आफ्नै कमाइ आफन्तसम्म पुर्‍याउन झेलिरहेका समस्याहरू देखेका हामीहरूले छिटो, भरपर्दो माध्यम खोजी गर्दै गर्दा आईएमईको जन्म हुन पुगेको हो ।’

अध्यक्ष ढकालले आईएमईलाई चाँडै नै 'पब्लिक' मा लैजाने जानकारी पनि गराउनुभयाे । ‘नागरिकलाई नै मालिक बनाउने हाम्रो अर्को यो पहल हो’, उहाँले भन्नुभयाे ।

रेमिट्यान्सको आकार बढेको, डिजिटल प्रविधिको विकाससँगै रेमिट्यान्सलाई डिजिटल माध्यमबाट सिधै वालेटमा वा बैंक खातामा पठाउन सकिने भएकाले रेमिट्यान्स कम्पनीको क्षेत्राधिकार विस्तारमा नेपाल राष्ट्र बैंकले सहजीकरण गर्ने विश्वास रहेको अध्यक्ष ढकालले उल्लेख गर्नुभयाे ।

कार्यक्रममा राष्ट्र बैंकका कार्यकारी निर्देशक पौडेलले रेमिट्यान्स कम्पनीलाई समयानुकूल क्षेत्र विस्तार गर्न प्रोत्साहन गरिरहेको उल्लेख गर्दै रेमिट्यान्स सेवा शुल्कलाई थप कम हुने अपेक्षा राखिएको बताउनुभयाे ।

यस्तै आईएमईमा गाभिएको जीएमई रेमिटका अध्यक्ष अर्जुन शर्मा पौडेलले कोरिया, जापान लगायतका उदाउँदा श्रम गन्तव्यहरू लक्षित गरी सेवा दिइरहेको जीएमई रेमिटलाई सम्मानजनक रूपमा आईएमईमा गाभिन सफल भएको बताउनुभयाे ।

अन्तिम अपडेट: पुस ११, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्