गौतमबुद्ध अन्तर्राष्ट्रिय क्रिकेट रंगशाला निर्माणको काम रोकियो

जेठ १६, २०७६ बिहीबार ८:१४:४९ | राधेश्याम खतिवडा

चितवन – चितवनमा निर्माणाधीन गौतमबुद्ध अन्तर्राष्ट्रिय क्रिकेट रंगशाला निर्माणस्थलमा लगाइएको बार केही स्थानीयले भत्काएपछि निर्माणको काम रोकिएको छ ।

बुधबार बिहान डोजरसहित आएका केही व्यक्तिले जस्तापाताले लगाएको बार भत्काइदिएपछि धुर्मुस सुन्तली फाउण्डेशनका अध्यक्ष सिताराम कट्टेल(धुर्मुस)ले विज्ञप्ति निकालेर तत्कालको लागि निर्माण कार्य स्थगित गरेको जानकारी गराउनुभएको छ । बार भत्काउने क्रममा उनीहरुले धुर्मस–सुन्तली फाउण्डेशनका कर्मचारीहरुलाई धम्कीसमेत दिएका थिए ।

काम गर्ने वातावरण नभएकाले काम स्थगित गरिएको विज्ञप्तिमा उल्लेख छ । कर्मचारी, कामदारको जिउ ज्यान, भौतिक सम्पतिको सुरक्षाको विषयमा खतरा र गम्भीर परिस्थितिको सिर्जना भएको हुँदा यो सम्बन्धमा स्थायी समाधान र कार्यवातावरण तयार नभएसम्मका लागि कामकारवाही स्थगित गरिएको बताइएको छ ।

रंगशाला निर्माणको काम सुरु गरेदेखि नै कार्य वातावरणमा असहजता सिर्जना गर्ने, विभिन्न अनुचित माग राख्ने र फाउण्डेशनका कर्मचारी तथा सहयोगीहरुलाई धम्क्याउने लगायतका अनुचित कार्य भैरहँदा पनि चितवनवासीको सम्मानमा चोट नपुगोस् भनेर यस्ता गतिविधिलाई सामान्य रुपमा लिँदै काम अघि बढाइरहेको अवस्थामा अहिले सुरक्षा माथि नै चुनौती बढेपछि बाध्य भएर काम रोक्नु परेको फाउण्डेशनको भनाइ छ ।

दोषीलाई कारबाहीको माग

घटना पश्चात् अनुगमनमा पुगेकाहरुले दोषीलाई तत्काल पक्राउ गरी कारबाही हुनुपर्ने माग गरेका छन् । घटनाको चौतर्फी विरोध भएको छ । दोषीलाई कारबाही गरी निर्माणको कामलाई प्रभावकारी रुपमा अगाडि बढाउनुपर्ने माग चितवनका बासिन्दाको छ ।

भरतपुर महानगरपालिकाकी प्रमुख रेनु दाहाल, प्रमुख जिल्ला अधिकारी जितेन्द्र बस्नेत लगायतका राजनैतिक दलका नेताको टोलीले स्थलगत अनुगमन गरेको छ ।

जिल्ला समन्वय समिति चितवनका प्रमुख कृष्णकुमार डल्लाकोटोलीले घटना असोभनीय र दुःखद् भएकाले दोषीलाई कारबाही हुनुपर्ने बताउनुभएको छ । अन्तर्राष्टिय गौरवको आयोजनाको रुपमा काम भइरहेको रंगशाला निर्माणको क्रममा यस्तो घटना हुनु दुःखद विषय भएकोले चाहो जोकोही होस् यस्तो गतिविधिमा संलग्नलाई तत्काल कार्वाही गर्नुपर्ने उहाँले बताउनुभयो ।

यसैगरी प्रमुख जिल्ला अधिकारी जितेन्द्र बस्नेतले घटनामा संलग्न जोसुकै भए पनि कडा कारबाही गरिने बताउनुभएको छ । भत्काउने काममा संलग्न भएका मुख्य व्यक्तीको खोजी भइरहेको र संकास्पद केही व्यक्तिलाई पक्राउ गरिएको बताउँदै प्रमुख जिल्ला अधिकारी बस्नेतले कानुन हातमा लिएर मनलाग्दी गर्ने कोहीलाई नछाडिने बताउनुभयो ।

सडक बाटोको विवाद

रंगशालाको सीमानामा पर्ने सडक बाटो फारकीलो बनाउने विषयलाई लिएर बनेको संरचनामा डोजर लागाएका हुन् । विश्वविद्यालयसँग साँध जोडिएका जग्गाधनीहरूले बाटो फराकिलो पार्नुपर्ने माग राखेका थिए ।

निर्माणाधीन क्रिकेट रंगशालाको पश्चिमतर्फबाट अहिले पनि सडक गएको छ । विश्वविद्यालयबाट जग्गा प्राप्त भैसकेपछि फाउण्डेशनले २० विगाहा ६ कठ्ठा जग्गामा जस्ताको बार लगाउने क्रममा बस्ती क्षेत्रमा विवाद भएको थियो । बस्ती र रंगशालाको सीमानामा ७ मिटरको सडकबाटोलाई केही स्थानीयले ३१ मिटरको बनाउनुपर्ने माग गरेका थिए ।

बस्ती क्षेत्रमा आफ्ना नाममा भएका जमिनमा भन्दा रंगशालाका लागि छुट्याइएको जग्गामा पर्ने गरी ३१ मिटर सडक बाटो बढाइनुपर्ने केही स्थानीयको माग रहेको थियो । रंगशालाका लागि विश्व विद्यालयले दिएको जग्गाको चौडाइ २५० मिटर मात्र रहेको र ३१ मिटरकोे सडक रंगशालाकै जग्गामा पर्नेगरी सडक बनाउदा रंगशाला बनाउन कठिन हुने थियो ।

फाउण्डेसनका तर्फबाट १० मिटर छोड्ने प्रतिबद्धता भएको थियो । अहिले भइरहेको ७ मिटिर रंगशालाको तर्फबाट १० मिटर र स्थानीयले ३ मिटर सडकलाई छुट्याएर २० मिटरको सडक बनाउने विषय लगभग टुंगिएको थियो । केही स्थानीय अगुवाहरुसँग छलफल पश्चात अघिल्लो दिन यही अनुसार बार लगाइएको थियो । तर भोलिपल्ट बिहान केही स्थानीयको उक्साहटमा क्षतविक्षत हुनेगरी डोजर लागाएर बनेका संरचना भत्काइएको हो ।

मुख्य योजनाकाकार सहित १७ जना पक्राउ

रंगशाला निर्माणका क्रममा संरचनासहित भत्काउने १७ जनालाई जिल्ला प्रहरी कार्यालय चितवनले पक्राउ गरेको छ । झण्डै एक किलोमिटर जति बार भत्काएपछि प्रहरी घटनास्थलमा पुगेको थियो । साइटकै सुरक्षामा खटिएका दुईजना प्रहरीले खिचेको फोटो समेत डिलिट गर्न उनीहरुले धम्की दिएका थिए ।

घटनामा संलग्न भएको आशंकामा १७ जना पक्राउ गरेको र मुख्य योजनाकारको आरोप लागेका प्रकाश कँडेललाई पनि पक्राउ गरिएकोे प्रहरीले बताएको छ । बार भत्काउन प्रयोग गरिएको डोजर प्रहरीले नियन्त्रणमा लिएको छ ।

केही स्थानियले फाउण्डेसनका कर्मचारीलाई पटक पटक धम्काउदै आएका थिए । रंगशाला निर्माणका क्रममा आफूले ठेक्काको काम पाउनुपर्ने र नभए केही कमिसन समेत चाहिने जस्ता दवाब दिँदै आएका थिए ।

बार भत्काउने क्रममा उनीहरुले धुर्मस–सुन्तली फाउण्डेशनका कर्मचारीहरुलाई धम्कीसमेत दिएका थिए । त्यहाँका केही स्थानीय ठेकेदारले आफूहरुसँग निर्माण सामाग्री लिनुपर्ने, केही प्रतिशत स्थानीयलाई कमिसन दिनुपर्ने माग गर्दै साइट कार्यालयमा गई धम्की दिने गरेका छन् । तिनै धम्की दिने व्यक्तिहरुले नै डोजर लगाएर बार भत्काएको फाउण्डेसनका एक कर्मचारीले बताए ।

यो पनि पढ्नुहोस् ।

रंगशालाको बार भत्काइएपछि भावुक हुँदै धुर्मुसले भने : विदेशमा बस्ने नेपालीको पसिनामाथि डोजर चलाइयो

अन्तिम अपडेट: मंसिर १०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

राधेश्याम खतिवडा

राधेश्याम खतिवडा उज्यालोका चितवन सहकर्मी र नेपाल पत्रकार महासंघ चितवन शाखाका पूर्व अध्यक्ष हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्