रक्सी बेच्न छाड्नेलाई १ लाख २० हजार पुरस्कार !

साउन १०, २०७६ शुक्रबार १३:३८:५७ | जयराज अवस्थी

बैतडी – बैतडीको दोगडाकेदार गाउँपालिकाले रक्सी बेच्न छाड्ने व्यवसायीलाई १ लाख २० हजार पुरस्कार दिने निर्णय गरेको छ ।

गाउँपालिकाको सार्वजनिक सुनुवाइ कार्यक्रममा गाउँ कार्यपालिकाले रक्सी बेच्न छोड्ने व्यवसायीलाइ १ लाख रकमको पुरस्कार दिने निर्णय गरेको गाउँपालिका उपाध्यक्ष पार्वती कार्कीले बताउनुभयो ।

गाउँपालिकाभित्रका जोसुकै रक्सी व्यापारीले रक्सीको कारोबार गर्दिनँ भनेर मदिरा बिक्री वितरण अनुमति पत्र बुझाएमा गाउँपालिकाका तर्फबाट १ लाख र आफ्नो व्यक्तिगत तर्फबाट २० हजार रकम थप गरेर जम्मा एक लाख २० हजार दिइने उहाँले बताउनुभयो । रक्सीले गर्दा गाँउघरमा महिला हिंसाका घटनाहरु बढेकाले हिंसा न्यूनीकरणका लागि गाउँपालिकाले यस्तो निर्णय गरेको उहाँले प्रष्ट पार्नुभयो ।

रक्सीका कारण आफ्नै पतिबाट हिसांमा परेको कुरा लिएर स्थानीय महिलाहरु आफूकहाँ आउने गरेको र आफूले सम्झाउँदा पनि नमान्ने गरेकोले निकै समस्या भइरहेको उहाँले बताउनुभयो । न्यायिक समिति सयोजक भएकाले यस्ता घटनाहरु मिलाउने जिम्मेवारी भए पनि आफूलाई निकै सकस भएको उहाँले गुनासो गर्नुभयो ।

यस्तै गाँउपालिका अध्यक्ष चक्र कार्कीले रक्सीको कारोबार अत्यधिक बढेकाले महिला हिंसा बढ्नुका साथै समाजमा विभिन्न खालका विकृति समेत ल्याएको बताउनुभयो ।

स्थानीय बजारहरुमा मान्छेहरु बिहानदेखि नै रक्सी पिएर ढलिरहेका भेटिने गरेकोले यस्तो निर्णय गरेको उहाँले बताउनुभयो । उहाँले भन्नुभयो, ‘गाँउपालिकाले एक चोटी रक्सी बन्द गरे पनि लुकिछिपी कारोबार झन बढेकाले र पूर्ण रुपमा नियन्त्रण नभएपछि हामीले रक्सी कारोबार गर्न छोड्ने व्यापारीलाई अर्को व्यवसाय सञ्चालन गर्न पैसा दिने योजना अघि सारेका हौँ ।’

गाउँपालिकाले दिने १ लाख २० हजारले नास्ता पसल, मासु पसललगायत अन्य व्यवसाय सञ्चालन गर्न सकिने भएकाले यस्तो निर्णय गरेको उहाँले बताउनुभयो ।

दोगडाकेदारमा गाउँपालिकामा अरु पसलभन्दा पनि रक्सी पसल बढी रहेको उहाँले बताउनुभयो । गाउँपालिकाभित्र सञ्चालित अरु पसलहरु दर्ताबिना नै सञ्चालन छन् । रक्सी पसल भने दर्ता गरेर सञ्चालन भइरहेको अध्यक्ष कार्कीले जानकारी दिनुभयो ।

अन्तिम अपडेट: पुस ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

जयराज अवस्थी

जयराज अवस्थी बैतडीका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्