साथी यमराजको जहाजमा उडि गएछौ

साउन २०, २०७७ मंगलबार ११:४४:१२ | अमित राई

अमित चाम्लिङ/हाल कुवेत ।

चढ्दाचढ्दै जीवनको उकालो
थाकेछौ साँच्चै साथी
हुरीमा सिमल फूलझैँ टाढा–टाढा
उडि गयौं ।

रहरलाग्दा रहरहरु बिसाउनु पर्ने
कारण के थियो र यतिबेलै ?

सङ्घर्षको सम्झौतापत्रमा हस्ताक्षर गरेर
दुःखका रेगिस्तान नाघ्दै नै थियौं ।

खुशीको जहाज चढ्ने बेला
घरको बलेसीमा उभिएर
कति निर्मम भएका थियौ

आमाको वृद्ध आँखाले छेक्न सकेन बाटो
एकटकले हेरिरहेकी
प्यारी छोरीको अनुहार कुल्चेर हिँडेका थियौ

अर्धाङ्गिनीसँग

एक थुङ्गा फूल साटेर
उँधोउँधो गल्छीको बाटो ।

घर वरपर पहिरो जान्थ्यो
साहुको ऋणमा झनै कठ्याङ्ग्रिन्थ्यो हिउँद
पीरलो बर्खे भेल तीन चुल्हामा पस्थ्यो
गुहार भन्थ्यो छोरीको किञ्चित अनुहार
आर्धाङ्गिनीको फाटेको कुर्तासलवार
बाढीलाई गाँठो पारूँ भन्थ्यो,

ममतापूर्ण वृद्ध आमाको चेहेरा
बाढीजस्तै धमिलो देखिन्थ्यो ।

सपना जे देखे नि तिमीसँग बेग्लै र सुन्दर सपना थियो
एक सुटकेस माया र सम्झना बोकेर
मरुभूमिमा अरफाज फूल जस्तो फुलेकै थियौ ।

तर, बलेसीमा छोडिएकी आमा
अरफाज फूल जस्तै छोरी
थुङ्गे फूलमै साटिएको माया
उनेर माला गलामा नलाउँदै

छोरीको तस्बिर र साहुको तमसुक राखेर
सिरानीमुनि

धत् ! आत्महत्याको टिकट काटेर
यमराजको जहाजमा उडि गएछौ ।

तिम्रो टिकटको अर्धकट्टी
कोभिड १९, २०२० च्यातेर
तिमीलाई अरफाज फूल चढाइरहेछु म
सेल्फ क्वरेण्टीनबाट ।।

अन्तिम अपडेट: मंसिर १०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

अमित राई

भोजपुरका अमित राई हाल कुवेतमा कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्