संवैधानिक आयोगलाई पूर्णता दिन ढिलाइ, नेकपा र कांग्रेसबीच आज हुने भनिएको छलफल स्थगित

असोज १, २०७७ बिहीबार १४:२९:१६ | उज्यालो सहकर्मी

काठमाण्डाै – लामो समयदेखि रिक्त रहेका संवैधानिक आयोगलाई पूर्णता दिन अझै अलमल भएको छ । आदिवासी जनजाति आयोग, महिला आयोग, दलित आयोगलगायत संवैधानिक आयोगका विभिन्न पदमा पदाधिकारी चयन हुन बाँकी छ ।

आयोगमा पदाधिकारी नियुक्तिका लागि संवैधानिक परिषदले सिफारिस गर्नुपर्ने हुन्छ । तर लामो समयदेखि परिषदले बैठक राखेर यसबारे निर्णय नै गर्न सकेको छैन । पदाधिकारी नियुक्तिबारे सत्तारुढ दल नेपाल कम्युनिस्ट पार्टी (नेकपा) र प्रमुख प्रतिपक्षी दल नेपाली कांग्रेसबीच भागबण्डा मिल्न नसक्दा संवैधानिक आयोले पूर्णता पाउन नसकेको हो ।

अहिलेसम्म राष्ट्रिय महिला आयोग, राष्ट्रिय दलित आयोग र आदिवासी जनजाति आयोगमा पाँच/पाँच जना पदाधिकारी नियुक्त गर्न बाँकी छ । त्यस्तै राष्ट्रिय समावेशी आयोग, मधेसी आयोग, थारु आयोग, मुस्लिम आयोग र राष्ट्रिय प्राकृतिक स्रोत तथा वित्त आयोगमा चार/चार जना पदाधिकारी चयन गर्न बाँकी छ ।

अख्तियार दुरुपयोग अनुसन्धान आयोगमा प्रमुख आयुक्त नै रिक्त भएकोले तीन जना पदाधिकारी चयन गर्नुपर्ने भएको छ । निर्वाचन आयोगमा पनि दुई वटा पद खाली छन् । यस्तै भाषा आयोगमा ६ जना पदाधिकारी चयन गर्नुपर्नेछ ।

संवैधानिक आयोगमा भागबण्डाको लागि प्रधानमन्त्री एवं सत्तारुढ दल नेपाल कम्युनिस्ट पार्टी (नेकपा) का अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डबीच केही चरणमा छलफल भएको छ । प्रमुख प्रतिपक्षी नेपाली कांग्रेसका सभापति शेरबहादुर देउवासँग छलफल भए पनि सहमति भइसकेको छैन ।

परिषदमा प्रधानमन्त्री अध्यक्ष, प्रधानन्यायाधीश, सभामुख, राष्ट्रिय सभा अध्यक्ष, विपक्षी दलका नेता र उपसभामुख सदस्य रहने व्यवस्था छ ।

संवैधानिक आयोगका पदाधिकारी नियुक्तिबारे आज (बिहीबार) सत्तारुढ नेपाल कम्युनिस्ट पार्टी नेकपा र नेपाली कांग्रेसका नेताहरुबीच छलफल हुने भनिए पनि स्थगित भएको छ । नेपाली कांग्रेसका सभापति शेरबहादुर देउवाको सचिवालयका एक व्यक्तिमा कोरोना पोजेटिभ देखिएको र उहाँ होम क्वरेण्टीनमा बस्नु परेकाले केही दिनका लागि बैठक स्थगित भएको हो ।

अन्तिम अपडेट: पुस २८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्