साउदीमा राम्रो काम लगाइदिने प्रलोभनमा नेपालीले नेपालीलाई ठग्ने क्रम बढ्यो

माघ १२, २०७८ बुधबार १२:४३:१६ | उज्यालो सहकर्मी

काठमाण्डौ – साउदीमा कार्यरत नेपालीलाई भइरहेको काम छाडेर राम्रो रोजगारी पाइने प्रलोभनमा नपर्न साउदीमा रहेको नेपाली दूतावासले अनुरोध गरेको छ ।

दूतावासमा साउदीमा रहेका नेपालीले नै विभिन्न परिचय र टेलिफोन नम्बरबाट फोन गरी राम्रो जागिर लगाइदिने प्रलोभन देखाउँदै ठग्ने गरेको गुनासो प्राप्त भएको भन्दै दूतावासले यस्तो ठगीबाट बच्न अनुरोध गरेको हो ।

भर्खरै इकामा बनाएका श्रमिकलाई खाइपाइ आएको तलब र सुविधाभन्दा बढी दिने काम लगाइदिने बहाना बनाउने र रोजगारी छोड्न लगाइ गैर कानुनी हिसाबले काममा लगाउने गरेको पाइएको दूतावासले जनाएको छ ।

साउदीमा कम्पनी छाडेर भाग्नु गैर कानुनी र अनैतिक मानिन्छ भने यसरी काम गरिरहेका श्रमिकलाई भगाउनु अपराध हो ।

दूतावासका अनुसार यसरी गरिरहेको काम छाडेर भाग्दा साउदीका रोजगारदाताले नेपाली श्रमिकलाई शङ्काको दृष्टिकोणले हेर्ने र उनीहरूप्रति अविश्वास बढ्दै गएको छ ।

एउटा कम्पनीको इकामा लिएर भाग्ने प्रवृत्तिलाई निरुत्साहित गर्न र कामदारलाई सचेत गराउन दूतावासमा साउदीका अधिकारीहरूले अनुरोधसमेत गरेका छन् ।

यसरी मानव तस्करीका रूपमा रहेको कामदार भगाउनेहरूको खोजी गरिरहेको भन्दै यस्तो कार्य नगर्न र नगराउन दूतावासले सबैलाई सचेत गराएको छ ।

साउदीमा गैर कानुनी हैसियतमा रहेका व्यक्ति बिरामी भएर उपचार गर्नुपर्दा अस्पताल छिर्न नपाउने, दुर्घटना भएर घाइते वा अङ्गभङ्ग भएमा त्यसको उपचार र क्षतिपूर्तिसमेत पाइँदैन । गैर कानुनी रूपमा रहेका श्रमिकको कुनै कारणबाट ज्यान गएमा शव नेपाल ल्याउने जिम्मासमेत कसैले नलिने हुँदा शव ल्याउन समेत समस्या पर्छ ।

अन्तिम अपडेट: पुस १८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्