वैदेशिक रोजगारीमा जाने दक्ष श्रमिकको सङ्ख्या बढ्दै, पौने आठ लाख बिदेसिँदा पाँच लाखभन्दा धेरै दक्ष

साउन १८, २०८० बिहीबार १७:३३:४७ | उज्यालो सहकर्मी

काठमाण्डौ – वैदेशिक रोजगारीमा जाने दक्ष श्रमिकको सङ्ख्या बढ्दै गएको छ ।

गएको आर्थिक वर्ष २०७९/०८० मा पौने आठ लाख नेपाली श्रमिकले वैदेशिक रोजगारीमा जान श्रम स्वीकृति दिँदा पाँच लाखभन्दा धेरैले दक्ष श्रमिकको रूपमा श्रम स्वीकृति लिएको वैदेशिक रोजगार विभागले जनाएको छ ।

गएको आर्थिक वर्ष २०७९ साउनदेखि २०८० असार मसान्तसम्म वैदेशिक रोजगारीमा जान सात लाख ७१ हजार ३२७ जनाले श्रम स्वीकृति लिँदा पाँच लाख ६७ हजार ४६ जनाले दक्ष श्रमिकको रूपमा श्रम स्वीकृति लिएका छन् ।

दक्ष श्रमिकको रूपमा श्रम स्वीकृति लिनेमा ४३ हजार ५४२ जना महिला रहेका छन् भने गएको आर्थिक वर्ष ७२ हजारभन्दा धेरै महिलाहरू श्रम स्वीकृति लिएर विदेश गएका छन् ।

दक्ष श्रमिकको रूपमा वैदेशिक रोजगारीमा जानेको यो सङ्ख्या अघिल्ला वर्षहरूको तुलनामा बढेको हो । आर्थिक वर्ष २०७८/०७९ मा वैदेशिक रोजगारीमा जान छ लाख ३० हजार ९० जनाले श्रम स्वीकृति लिँदा दुई लाख ९१ हजार ८८९ जनाले दक्ष श्रमिकको रूपमा श्रम स्वीकृति लिएका थिए ।

यस्तै गएको आर्थिक वर्ष २०७९/०८० मा दुई लाख २६ हजार १६ जना अदक्ष श्रमिक विदेश गएका छन् भने ६० हजार पाँच सय ५५ जना अर्ध दक्ष श्रमिकहरू विदेश गएका छन् । एक हजार एक सय ५३ जना व्यावसायिक र दुई सय ५७ जना उच्च सीप भएका व्यक्तिहरू श्रम स्वीकृति लिएर विदेश गएका छन् ।

आर्थिक वर्ष २०७७/२०७८ मा भने अर्ध दक्ष श्रमिकको सङ्ख्या धेरै रहेको थियो । यो आर्थिक वर्ष एक लाख ६६ हजार ६९८ जनाले श्रम स्वीकृति लिँदा एक लाख ५५ हजार ८३ जना अर्ध दक्ष र ८० हजार ३८२ जना अदक्ष श्रमिकले श्रम स्वीकृति लिएका थिए ।

दक्ष श्रमिकको रूपमा श्रम स्वीकृति लिने श्रमिकको सङ्ख्या ७० हजार ४२६ थियो ।

बिस्तारै अदक्ष श्रमिकको रूपमा जानेहरूको सङ्ख्या घटेको छ भने दक्ष श्रमिकको रूपमा जानेहरू बढेको विभागले श्रम स्वीकृति दिएको तथ्याङ्कले देखाउँछ ।

अन्तिम अपडेट: पुस ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्