चितवनमा हुर्किएका पुष्पा र अञ्जली कोशी टप्पुमा पुगे

असोज १०, २०८० बुधबार १६:२२:२६ | उज्यालो सहकर्मी

चितवन – चितवनका दुई वटा पोथी गैँडा पुष्पा र अञ्जली आज बुधवारदेखि कोशी टप्पुमा पुगेका छन् । वंश विस्तारको योजनाअनुसार चितवन राष्ट्रिय निकुञ्जमा रहेका पुष्पा र अञ्जलीलाई कोशी टप्पु वन्यजन्तु आरक्षमा स्थानान्तरण गरेको आरक्षको कार्यालयले जनाएको छ ।

यी दुई पोथी गैँडा प्रजननयोग्य भएपछि भाले गैँडा ल्याउने पनि कार्यालयले जनाएको छ । पोथी गैँडा चार वर्ष र भाले गैँडा छ वर्ष पुगेपछि प्रजननयोग्य हुने आरक्षका प्रमुख संरक्षण अधिकृत रमेश यादवले बताउनुभयो ।

सौराहामा रहेको राष्ट्रिय प्रकृति संरक्षण कोषको कार्यालय परिसरमा मानिसको निगरानीमा हुर्किएका पुष्पाको उमेर तीन वर्ष आठ महिना र अञ्जलीको उमेर दुई वर्ष पाँच महिनाको रहेको छ । यी दुवै टुहुरा बच्चा हुन् ।

कोशी टप्पु पुर्‍याइएका पुष्पा र अञ्जलीलाई बस्नका लागि आरक्ष हातामा १६ फिट अग्लो र ८५ फिट लामो 'इन्क्लोजर' निर्माण गरेको आरक्षका प्रमुख संरक्षण अधिकृत यादवले बताउनुभयो । पानीसहितको घाँसे मैदान क्षेत्रमा रहने गैँडा आरक्ष सुरक्षामा खटिएको नेपाली सेनाको प्रत्यक्ष निगरानीमा रहनेछन् ।

२०७३ सालमा अर्नाको वंश विस्तारका लागि भन्दै कोशी टप्पुबाट १२ वटा अर्ना चितवन राष्ट्रिय निकुञ्ज पठाइएका थिए । त्यस बेला भएको अर्नाको सट्टामा गैँडा दिइने सहमतिअनुसार पुष्पा र अञ्जलीलाई कोशी टप्पुमा स्थानान्तरण गरिएको हो ।

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्