काठमाण्डौ – भेरी करिडोरअन्तर्गत जाजरकोट–डोल्पा सडक खण्डको ठेक्का लाग्न बाँकी रहेको ६२ किलोमिटर सतह चाँडै छिचोलिने भएको छ । करिडोरको एक सय १८ किलोमिटरमध्ये ५६ किलोमिटरमा कालेपत्रको काम भइरहेको छ भने तल्लुदेखि दुनैसम्मको ६२ किलोमिटरमा नेपाली सेनाले खोलेको ट्र्याकमाथि नै गाडी चलिरहेका छन् ।

दुनैदेखि ल्यासि क्यापसम्मको सडकमा निर्माण व्यवसायीले काम शुरु गरेका करिडोरका प्रमुख सुनिल रञ्जितकारले जानकारी दिनुभयाे । बीचमै काम छाडेर अधुरै रहेको यो सडक खण्डमा पुनः काम शुरु भएको हो ।

डोल्पाका प्रमुख जिल्ला अधिकारी तुलसीप्रसाद दाहाल तथा सुरक्षा निकायको टोलीले सडक खण्डको अनुगमन गरेर काममा तीव्रता दिन निर्देशन दिएको छ । बीचैमा काम छाडेमा ठेक्का तोडिने आयोजना प्रमुख रञ्जितकारले बताउनुभयो ।

तल्लुमा भेरी नदीको बेलिब्रिज पुल निर्माणको काम पनि अन्तिम चरणमा पुगेको छ । यो क्षेत्रमा अन्य पाँच वटा पुलको काम भने बाँकी नै छ । पछिल्लो समय सुरुङमार्ग निर्माण, सडक स्तरोन्नति, सिचाइँ आयोजनालगायतका काम धमाधम सम्पन्न हुन थालेका छन् ।