रोल्पा – नीति, कार्यक्रम तथा बजेटको अख्तियारी नआउँदा रोल्पामा रहेका प्रदेश सरकार मातहतका कार्यालय कामविहीन भएका छन् ।

गएको साउन १ गतेबाट जिल्लास्तरका सबै विषयगत कार्यालयहरु स्थानीय तहमा गएपछि ती कार्यालय भएका भवनमा अहिले प्रदेश मातहतमा रहने गरी केही कार्यालयहरु सञ्चालनमा छन् । तर कार्यालय स्थापना भएको चार महिना बितिसक्दा पनि प्रदेश सरकारले कुनै अख्तियारी पठाउन सकेको छैन् । कुनै अख्तियारी नपाउँदा ती कार्यालय अहिले सुनसान बनेका छन ।

एकभन्दा बढी जिल्ला हेर्ने गरी स्थापना गरिएका यी कार्यालयहरुमा दरबन्दी अनुसारका कर्मचारी पनि छैनन् । सेवाग्राही पनि आउँदैनन् । कतिपय कार्यालयमा भएका कर्मचारीहरुले पनि चार महिनादेखि तलब नपाएको गुनासो गरेका छन् ।

साविकको जिल्ला कृषि विकास कार्यालय भएको भवनमा अहिले रोल्पा र रुकुम पूर्व हेर्ने गरी कृषि ज्ञानकेन्द्र रोल्पा स्थापना भएको छ । ज्ञान केन्द्रमा अहिले कुनै कार्यक्रम नआएकाले सेवाग्राहीलाई परामर्श दिएर फर्काउने गरेको कार्यालय प्रमुख नरेश धितालले बताउनुभयो ।

जिल्ला सदरमुकाममा हुने अधिकांश सेवा–सुविधा स्थानीय तहबाटै दिने भने पनि अहिले फेरि प्रदेश मातहतका यी कार्यालयहरु कामविहीन भएका छन् ।