काठमाण्डाै – काठमाण्डौ महानगरपालिकाको महानगर गौरव योजना अन्तर्गत ‘रोजगारी र आय वृद्धि, काठमाण्डौको समृद्धि’ महानगरको सामाजिक विकास विभागले विभिन्न क्षेत्र र पेसाका तालिम सञ्चालन गरिरहेको छ ।

यीमध्ये वैशाख १२ गतेदेखि शुरु भएको बगैँचे र माली तालिममा २५ जनाले प्रशिक्षण लिइरहेका छन् । यो तालिम १५ दिन अवधिको हो । हरेक दिन बिहान ७ बजेदेखि ९ बजेसम्म राष्ट्रिय सभा गृहको बगैँचामा प्रशिक्षण हुने गरेको छ ।

फूल बगैँचा र बिरुवासम्बन्धी व्यावहारिक ज्ञान दिने क्रममा सोमवार प्रशिक्षार्थीलाई रत्नपार्कको अवलोकन भ्रमणका लागि लगिएको थियो । अवलोकनका क्रममा बगैँचाको ढाँचा, बोट, फूल र बिरुवाको व्यवस्थापनका बारेमा जानकारी गराइएको थियो ।

माली तालिम दिन आएका प्रशिक्षार्थीले पैसा तिरेर तालिम लिन सक्ने अवस्था नभएको भन्दै महानगरपालिकाले दिएको निःशुल्क तालिमले आफूहरूलाई ठूलो सहयोग पुगेकाे बताएका छन् ।

माली तालिममा फूल तथा बिरुवाका बेर्ना उमार्ने, स्याहार–कलमी गर्ने, फूल तथा बिरुवामा लाग्ने किरा, रोग र रोकथामका उपाय लगायतका बारेमा सैद्धान्तिक र व्यावहारिक ज्ञान र सीप सिकाइन्छ ।