काठमाडौं – सांसदमा निर्वाचित भएको झण्डै १३ महिनापछि सपथ लिएका रेशम चौधरीले अदालतले आफूलाई न्याय दिनेमा आफू विश्वास्त रहेको बताउनुभएको छ ।

सिंहदरबारस्थित संसद सचिवालयमा बिहीबार सांसदको पद तथा गोपनियताको सपथ लिएपछि संचारकर्मीसँग संक्षिप्त प्रक्रिया दिँदै चौधरीले आफूले न्याय पाउनेमा विश्वस्त रहेको बताउनुभएको हो ।

दोषी उम्किनुपर्छ भन्नेमा आफू नरहेको भन्दै उहाँले आफूमाथि राजनीतिक मुद्धा लागेकाले सोही अनुसार सम्बोधन गर्न आग्रह गर्नुभयो । राजनीतिक दुर्घटनाको निराकरण राजनीतिक रुपमा नै गरिनुपर्ने तर्क उहाँको थियो ।

उहाँले टीकापुर घटना, सामाजिक सञ्जालमा जिस्काउने घटना नभई वर्गीय, जातीय भावनालाई ठेस पुगेको घटना भएको भन्दै त्यस क्रममा जेलमा रहेकाहरुमाथि स्पष्ट छानबिन गरी राज्यले सबैलाई न्याय दिनुपर्ने बताउनुभयो । उहाँले भन्नुभयो, ‘रेशम चौधरी भिख चाहन्न, न्याय दिनुहोस् ।’

प्रहरीको फरार सूचीमा रहेकै समयमा चौधरी २०७४ मा मंसिर २१ गते भएको प्रतिनिधिसभा सदस्यको दोश्रो चरणको निर्वाचनमा कैलाली क्षेत्र नम्बर १ बाट निर्वाचित हुनुभएको थियो । उहाँले वाम गठबन्धनबाट एमाले उम्मेदवार रहेकी गरिमा शाहलाई पराजित गर्नुभएको थियो ।  

२०७२ साल भदौ ७ गते भएको टीकापुर घटनाका मुख्य आरोपीका रुपमा प्रहरीको फरार अभियुक्तको सूचीमा नै रहेका बेला वारेसनामा मार्फत उहाँले उम्मेदवारी दर्ता गराउनुभएको थियो । चौधरीले गएको फागुन १४ गते कैलाली जिल्ला अदालत समक्ष आत्मसमर्पण गर्नुभएको थियो ।