काठमाडौं – सगुनले खोलेको मिनी आईपीओमा लगानी गर्ने आज (२६ जुलाई) अमेरिकी समय अनुसार मध्यरात १२ बजे अगाडिसम्म रहेको जनाएको छ । 

सगुनले लगानीको लागि अब समय थप नहुने समेत बताएको छ । ‘यो अन्तिम अवसर हो,  राम्रोसँग हाम्रो योजनाहरु बुझेर क्षमता अनुसार लगानी गर्न अनुरोध गर्दछौँ’, फाउण्डर गोविन्द गिरीले आह्वान गर्नुभएको छ ।

अमेरिकी सेक्युरिटी एण्ड एक्सचेन्ज कमिसनबाट स्वीकृत पाएर सगुनले विश्वभरबाट मिनी आईपीओमार्फत लगानी भित्राइरहेको छ । सगुन अमेरिकी सरकारमा दर्ता भएको सामाजिक सञ्जाल हो । नेपाल सरकारले विदेशी कम्पनीमा लगानी गर्न छुट नदिएकोले नेपालभित्रबाट भने लगानी गर्न सकिँदैन तर विदेशमा बस्ने र बैंक खाता हुने नेपालीले बैंकबाट वायर गरेर वा डेबिट र केड्रिटकार्डबाट ट्रान्सफर गरेर समेत लगानी गर्न सक्नेछन् । 

सगुनमा सम्भावना देखेर हिन्दुस्तान टाइम्सले ५० लाख डलर लगानी गरको तथा टाइम्स अफ् इन्डियाले लगानी गर्ने रुची देखाइरहेको गिरी बताउनुहुन्छ । ‘सिलिकन भ्याली (अमेरिका), चीन र भारतमा रहेका इकमर्स कम्पनीका साथै स्टार्टअप कम्पनीमा लगानी गर्ने भेन्चर क्यापिटल कम्पनी र संस्थागत लगानीकर्ताहरुसँग हाम्रो कुरा भइरहेको छ’, उहाँले भन्नुभयो, ‘हामी मिनी आईपीओ निस्काशन बन्द हुनासाथ ४० वटा ठूला कम्पनीमा आईडिया पिच गर्दैछौँ ।’

सगुनले मिनी आईपीओ निस्काशन गरेर अहिलेसम्म झण्डै ५० लाख डलर (५५ करोड) रुपैयाँ लगानी जुटाएको छ । ग्लोबल कम्पनी बन्दै गएको स्टार्टअप कम्पनी सगुनमा विश्वभरका ३ हजार ५ सयभन्दा बढी लगानीकर्ताले सेयर खरिद गरेका छन् । 

सगुनले अमेरिकी सेक्युरिटी एक्स्चेन्जकमिसनको अनुमतिलिएर गएको वर्षको जुलाई २६ मा मिनी आईपीओ निस्काशन गरेको थियो । अमेरिकाले ल्याएको नयाँ कानुन   अनुसार सगुनमा पहिलो पटक सर्वसाधारणले सेयर लगानी गर्ने अवसर पाएका हुन् ।