काठमाण्डौ - नेपाल–भारत मानव विकास एवं मैत्री संघले चिकित्सकका लागि आवश्यक व्यक्तिगत सुरक्षा सामग्री पीपीई सहयोग गरेको छ । 

शहरी विकास राज्यमन्त्री रामवीर मानन्धरले संघले उपलब्ध गराएको ३ सय थान पीपीई स्वास्थ्यमन्त्री भानुभक्त ढकाललाई हस्तान्तरण गर्नुभएको हो ।

राज्यमन्त्री मानन्धरले स्वास्थ्य मन्त्रालय पुगेर कोरोनाविरुद्धको स्वास्थ्य उपचारमा संलग्न चिकित्सकका लागि आवश्यक व्यक्तिगत सुरक्षा सामग्री पीपीई मन्त्री ढकाललाई हस्तान्तरण गर्नुभएको हो । पीपीई सेट हस्तान्तरण गर्दै राज्यमन्त्री मानन्धरले विपद्को समयमा आ-आफ्नो स्थानबाट सक्दो सहयोग गर्न सबैलाई आह्वान पनि गर्नुभयो ।

स्वास्थ्य तथा जनसंख्या मन्त्री ढकालले कोरोना सङ्क्रमणको उपचारमा अत्यन्तै महत्वपूर्ण स्वास्थ्य सामग्री पीपीईले उपचारमा खटिएका स्वास्थ्यकर्मीको मनोबल बढाएर उत्साहित बनाउन सहयोगी भूमिका निर्वाह गर्ने बताउनुभयो । 

उहाँले सरकारले टेकुमा मात्रै रहेको प्रयोगशालालाई विस्तार गरी प्रदेश प्रदेशमा पुर्याएको र अझै पनि आवश्यक सामाग्रीहरु पुर्याउने क्रममा रहेको उल्लेख गर्दे संकटको बेला हिलो छ्याप्ने काम छोडी महामारी विरुद्ध हातेमालो गर्न सबैलाई आह्वान गर्नुभयो । 

पीपीई सेटमा गाउन, भाइजर, पञ्जा, एप्रोन, मास्क लगायत सामान छन् ।