Dr BP Khanal

गोपाल दाइ, नमस्कार ! "कोरोना क्याप्सुल" बनाएर डोज मिलाउँदै मनका रोगीको खोजीखोजी खुवाउन थाल्नुभएको देखेर म निकै उत्साहित भएको छु। तपाईंले ठीक भन्नुभयो अहिले गलत सूचना संक्रमणले असंख्य मानिसहरूलाई झनै बढी तर्साउने काम गरेकोे छ। त्यसमा हाउगुजीको खेती गर्नेहरूले आफ्नो खेती फस्टाएको ठानेका होलान् । तिनीहरूलाई निकोपार्ने अर्को क्याप्सुल बनाउने सल्लाह पस्किने आँट देखाएको छु। जसरी कोरोना महामारीलाई मान्छेका उमेरसँग जोडेर दुस्प्रचार गरिएको देखियो, त्यसैगरी यसलाई मान्छेको धार्मिक आस्थासँग पनि जोडिएको छ। जस्तै , चीनियाहरू नास्तिक भएकोले संक्रमण फैलियो, वा इटाली, बेलायत र अमेरिका ख्रीष्टियन भएकोले बढी कोरोनाको आक्रमणमा परे, आदि। यो अफवाहलाई हुस्याउने क्याप्सुल बनाएर खुवाउनुहुन अनुरोध गर्छु। अहिले लकडाउन, सोसिएल डिस्ट्यान्सिङ र आइलेसन जस्ता उपायसँगै कसैले तोकिएको कानुन र अनुशासनमा रही आफ्नो आस्थाअनुसार कोरोनाको विरुद्धमा थोरैमात्र प्रयासमा लाग्ने मानिसहरूले ठीकै गरेका हुन् भनी सामान्यरूपमा लिनुपर्छ ।ओखतीको खोजीमा लागेका वैज्ञानिक वा अनुसन्धानकर्ताहरूले गरेको प्रयत्न पनि यस्तै त हो नि। यस्ता प्रयत्नले पक्कै पनि दीगो उपाय निस्किने छ। प्रयासमा लागेका मानिसलाई समर्थन गरिदिँदामात्रै पनि आशा जगाउँछ। त्यसकारण अहिलेको ठूलो आवश्यकता नै उत्साह, ढाडस, हौसला, सान्त्वना हो, यही मानसिकतामा बलियो र सकारात्मक रहन सबैलाई अनुरोध गरौँ । अहिलेलाई यत्ति । तपाईंसँगै पीडितहरूको सेवामा, बि. पी. खनाल तीखेदेवल - १४ ललितपुर