अछाम - अछामको मङ्गलसेन नगरपालिकाले स्थापना गरेको क्वरेण्टीनमा बसेकाहरुको बिदाइ गरिएको छ ।

भारतका विभिन्न शहरबाट कैलालीको गौरिफन्टा नाका हुँदै आएर क्वरेण्टीनमा बसेका उनीहरुलाई सम्बन्धित पालिकाले सुरक्षित रुपमा घर जाने व्यवस्था मिलाएको हो । उनीहरुलाई गएको चैत १२ गतेदेखि करेन्टीनमा राखिएको थियो । 

क्वरेण्टीनमा बसेकाहरुलाई खादा ओडाएर प्रमाणपत्रसहित स-सम्मान बिदाई गरिएको हो । उनीहरुलाई आ-आफ्नो गाउँमा गएर सरकारले गरेको लकडाउनलाई पालना गर्न र सरकारको अभियानलाई सघाउन आग्रह गरिएको छ ।

क्वरेण्टीनमा अछामको आठ वटा पालिकाका  तीन बालबालिकासहित ४१ पुरुष र १२ महिला गरी ५३ जना बसेका थिए । उनीहरुलाई नगरपालिकाले खाना, नास्ता, सरसफाइ सामग्रीसहित हरेक दिन स्वास्थ्य जाँचका लागि हेल्थ डेस्क समेत स्थापना गरेको थियो ।

यो अवधिभर क्वरेण्टीनमा बसेकाहरुमा कुनै पनि स्वास्थ्यमा समस्या नआएको नगरपालिकाको स्वास्थ्य शाखा संयोजक मानबहादुर सोडारीले जानकारी दिनुभयो ।

नगरपालिकाले गएको फागुन १५ गतेदेखि यता भारतलगायत तेस्रो देशबाट आएका ६ सय २२ जनाको तथ्याङ्क सङ्कलन गरेर निगरानीमा राखिएको नगरपालिकाका सूचना अधिकारी खकेन्द्र बहादुर सोडारीले बताउनुभयो ।