दाङ - बेलझुण्डीमा रहेको कोरोना विशेष अस्पतालमा अहिले ९ जनाको आइसोलेसनमा राखेर उपचार भइरहेको छ ।

वीरगञ्जबाट कैलाली पुगेकी कोरोना सङ्क्रमित महिलासँगै आएकी दाङकी एक महिला र उनका ५ परिवार तथा  अन्य ३ जनालाई आइसोलेसनमा राखेर उपचार भइरहेको दाङका प्रमुख जिल्ला अधिकारी गोविन्दप्रसाद रिजालले जानकारी दिनुभयो।

वीरगञ्जबाट आउनेमा दाङकी एक महिला भएको थाहा पाउनेबित्तिकै सोमबार बेलुकी खोज गरी उनी र उनको परिवारलाई आइसोलेनमा पठाइसकेका र  उनीहरूमाथि उच्च निगरानी बढाइएको प्रमुख जिल्ला अधिकारी रिजालले बताउनु भयो ।

यो पनि पढ्नुहोस्

खाडी र मलेसियामा मंगलबारको कोरोना अपडेट : सङ्क्रमितको सङ्ख्या २० हजार नाघ्यो, सङ्क्रमणको शंका लागेमा यी नम्बरमा फोन गर्नुहोस्

---

अहिले आइसोलेनमा रहेकाहरूमा घोराही उपमहानगर वडा नम्बर १४ का ६ जना, एक जना सिमेन्ट कारखानामा कार्यरत र अरू २ जना राजपुर गाउँपालिकाको रहेका जिल्ला स्वास्थ्य कार्यालय कोभिड १९ फोकल पर्सन कमल चन्दले जानकारी दिनुभयो।

यस्तै, आइसोलेसनमा रहेका ९ जनाको स्वाब संकलन गरी कोरोना भए/नभएको जाँचका लागि पठाउने तयारी भइरहेको  उहाँले बताउनु भयो। यसअघि कोरोनाको आशंकामा आइसोलेसनमा राखिएका ४० जनाको स्वाब परीक्षण गर्दा रिपोर्ट नेगेटिभ आएपछि होम क्वारेन्टाइनमा बस्ने गरी डिस्चार्ज गरिएको छ ।

यस्तै, दाङमा ३ सय ४२ वटा क्वारेन्टाइन बेड रहे पनि भारतलगायत तेश्रो मुलुकबाट आएका वा आफूलाई शंका लागेकाहरू त्यहाँ गएर बस्नेको संख्या अत्यन्तै न्यून रहेको छ । जिल्ला विभिन्न पालिकाहरूका अहिले ३९ जना मात्रै क्वारेन्टाइनमा बसिरहेका छन् ।