काठमाण्डौ - राष्ट्रिय जनता पार्टी नेपालले सरकारले सोमबार ल्याएका दुई वटा अध्यादेशले राजनीतिलाई नै कलङ्कित बनाएको प्रतिक्रिया दिएको छ । 

राजपाको अध्यक्ष मण्डलका संयोजक शरदसिंह भण्डारीले मङ्गलबार  आज विज्ञप्ति निकालेर विश्व नै कोरोनाको महामारीले थलिएका बेला अध्यादेश ल्याउनु असामयिक र संवेदनहीन निर्णय भएको बताउनुभएको हो । 

उहाँले यसले समग्र राजनीतिलाई नै कलङ्कित बनाएको राजपाको ठहर रहेको बताउनुभएको हो । राजनीतिक दल विभाजन गर्न सजिलो बनाउने गरी ल्याइएको अध्यादेशले जनभावना विपरीत स्थिरता स्थायित्व आर्थिक समृद्धिकाे मान्यताविरुद्ध र देशलाई अस्थिरतातर्फ धकेल्ने षड्यन्त्र भएकाले तत्काल अर्को निर्णय गरी अध्यादेश खारेज गर्न राजपाले माग गरेको छ । 

यस्तै संवैधानिक परिषद्का विपक्षी दलका नेतालाई भूमिकाविहीन बनाइ संवैधानिक निकायमा आफूखुसी नियुक्ति गर्न तथा देशलाई एकात्मकता, निरङ्कुशता र अधिनायकवादतर्फ लैजाने मनसाय स्पष्ट भएको आरोप पनि राजपा नेपालले लगाएको छ । 

सरकारको यो कदमले राजपालाई कुनै असर नपार्ने दाबी गर्दै कोरोनाको जोखिम कम गर्न सबैले आ–आफ्नो ठाउँमा दत्तचित्त भएर लाग्न पनि राजपा नेपालले आग्रह गरेको छ ।

यो पनि पढ्नुहोस्

अप्रिल २१ : खाडी र मलेसियामा कोरोना सङ्क्रमितकाे सङ्ख्या ३४ हजार नाघ्याे